(Dili) Mudansa– Sekretariu Jeral Asosiasaun Jornalista Timor-Leste (AJTL) Acacio Pinto hatete, iha rejime sistema polítika demokrasia, iha ámbitu Liberdade Imprensa nian, mídia no jornalista presiza livre atu hala’o sira nia servisu iha fatin ne’ebé deit liu-liu iha espasu públiku hanesan Instituisaun Estadu nian.
SekJer ne’e akresenta, hanesan aktu violente hasoru jornalista Tatoli ne’e hakanek ona liberdade imprensa no valór Demokrasia iha Timor-Leste iha tempu ne’ebé Timor-Leste ninia index Liberdade imprensa tuun husi TOP 10 ba TOP 20.
“Asosiasaun Jornalista Timor-Leste (AJTL) husu ba Prezidente RAEAO Rogério Tiago Lobato atu foti medida no sansaun forte hasoru pesoál protokolu ne’ebé halo aktu violentu hasoru jornalista Tatoli iha espasu públiku iha Oecusse-Ambeno, iha rejime sistema polítika Demokrasia, iha ámbitu Liberdade Imprensa nian mídia no jornalista presiza livre atu hala’o sira nia servisu iha fatin ne’ebé deit liu-liu iha espasu públiku hanesan Instituisaun Estadu nian,”dehan Sekretariu Jeral Acacio Pinto,liu husi konferensia imprensa iha sede AJTL Fatuhada Díli,kinta (06/06/24).
Nia esplika, presizamente tenke iha garantia ida husi Aparellu Estadu atu mídia no jornalista sira livremente halo kobertura ba asuntun no informasaun ne’ebé iha ligasaun ho servisu Públiku nian sein impedimentu.
“Espasu livre no leberdade asesu ba informasaun mídia no jornalista nian hatuur kedas ona iha Konstituisaun RDTL, Artigu 40 no 41Garantia liberdade imprensa ne’e mós haktuur iha Lei Komunikasaun Sosiál Artigu 8 no artigu sira seluk Lei Komunikasaun Sosiál, atu proteje kualidade demokrasia iha Timor-Leste iha kontestu garante boa Governasaun no kontabilidade, midia no jornalista hola papél importante atu asegura sidadaun sira nia direitu espresaun nian no sira nia direitu ba informasaun liu husi kobertura no publikasaun notísia no programa sira mídia nian.” Nia subliña
Nia dehan, entidade hotu-hotu iha obrigasaun atu fó espasu livre ba jornalista sira atu asesu ba informasaun sira ne’ebé iha ligasaun ho servisu públiku nian, tanbà Liberdade Imprensa mak sai nu’udar espasu ba sidadaun sira atu hato’o sira nia hanoin no komentáriu hodi hakonu prinsípiu check and balance ba servisu hotu-hotu entidade Estadu nian.
“Asosiasaun Jornalista Timor Lorosa’e (AJTL) ne’ebé durante ne’e halo advokasia hodi promove no hametin Liberdade Imprensano liberdade espresaun iha país Demokrátiku ida-ne’e haree katak aktu violente pesoál protokolu RAEOA nian hasoru jornalista Ajénsia Notísioza Tatoli, Abilio Elo Nini iha loron 4 fulan Juñu tinan 2024 nu’udar tetantiva no ameasa ida ba Independénsia Jornalizmu no Liberdade Imprensa iha Timor-Leste hanesan haktuir iha Konstituisaun RDTL, Artigu 40 no 41 no Lei Komunikasaun Sosiál Artigu 41 kona-ba atentadu ba liberdade informasaun.” Nia esplika.
Tanba ne’e, AJTL haree aktu violente ida-ne’e sei afeita index ranking Liberdade Imprensaiha tinan sira tuir mai, bazeia faktu no situasaun ne’ebé temi leten.
“AJTL harak hato’o nia pozisaun kontra no kondena aktu violente hasoru Jornalista Tatoli ne’ebé komete husi pesoál protokulu iresponsavel RAEOA nian, tanbà aktu violente ne’e sei hatauk jornalista no mídia atu iha kontestu kobertura no publikasaun notísia, liu-liu atu garante papél media kontrolu sosial,”nia sublina.
AJTL mós konsidera aktu violente ida-ne’e la-hatudu mentalidade demokrátiku pesoál entidade sira Estadu nian atu garante boa governasaun no kontabilidade iha país demokrátiku Timor-Lest,maibé hatudu fali mentalidade vandalizmu hodi impede mídia no jornalista atu asesu ba informasaun sira ne’ebé iha ligasaun ho servisu Públiku nian.
Husu ba Sekretariu Estadu Komunikasaun Sosial (SEKOMS) atu komunika ho Instituisaun sira Estadu nian atu respeita mídia no jornalista nian servisu.
“Husu ba Sekretariu Estadu Komunikasaun Sosial (SEKOMS) atu komunika ho Instituisaun Estadu nian atu respeita mídia no jornalista nian servisu kolabora atu sira livremente asesu ba espasu públiku hotu hodi asesu informasaun sein iha impedimentu, Konselho Imprensa no Asosiasaun Jornalista hotu atu kontinua sosializa Lei Komunikasaun sosial ba entidade Estadu nian, liu-liu entidade sira RAEOA nian atu sira komprende papél mídia no jornalista nian iha país Demokrátiku ida-ne’e”SekJer Acacio sujere.
Aleinde ne’e, Jornalista no kanál mídia hotu iha rai-laran atu fó solidariade ba malu hodi kontinua publika kazu ne’e to’o hetan solusaun loloos no justu.
“Jornalista no kanál mídia hotu-hotu atu nafatin kumpri Kódigu Étika Jornaístika, Lei Komunikasaun Sosiál no prinsípiu sira jornalizmu nian bainhira hala’o knaar jornalizmu iha ne’ebé deit atu nafatin asegura no garante Liberdade Imprensa no liberdade espresaun iha Timor-Leste.”Nia hakotu
Jornalista :Ana Ribeiro/Estajiada Nelia Pereira
Editora : Delfina Borges
