(DILI) Mudansa- Governu Timor- Leste liu hosi Sekretario Estadu Foramasaun Professionál no Empregu(SEFOPE) Quarta-Feira ne’e assina tan kontratu ho traballadór hamutuk 73 atu ba servisu iha Australia.
“Ohin loron ita husik tan ita nia traballadór Timor oan hamutuk ema nain hitu nolu resin haat tuir lolos hitu nolu resin haat maibé tanba kolega ida horseik mate antaun ita hela ho hitu nolu resin tolu ne’ebé ohin ita husik sira atu ba servisu iha Australia sira ne’e maioria re-entry sira ne’ebé ba mai dala rua, dala tolu to’o dala lima, foun nain ida deit mak ohin ita husik”dehan Diretor Geral SEFOPE Carlito Rosario Cabral iha salaun DNEE Caicoli Dili 24/04/2024
Nia afirma tan katak Traballadór nain hitu nolu resin tolu ne’e kompostu husi feto sanolu resin-ualu no mane lima nolu resin-neen maioria iha hotu area agrikultura, tanba sira servisu ho durasaun tempu badak tempu badak ho nune’e mak SEFOPE tau sira iha area ida deit.
“Sira ne’e maioria iha area agrikultura tanba sira ho tempu badak fulan 6 to’o fulan 9, ne’ebé sira ne’e hotu-hotu iha area agrikultura feto iha 18 no mane iha 56 maka ohin ita husik hela sira” tenik nia
Governante ne’e mós nafatin fo mensagen ba Traballadór sira katak, nafatin obedese ba regra servisu ne’ebé maka husi komapñia fó, nu’udar Timor-oan tenke kopera di’ak ho estadu atu nune’e ema nafatin fo oportunidade ba ita nia nasaun atu ba servisu iha Australia tanba ita husik ita nia nasaun, ita husik ita nia família tanba ekonomia uma laran mak obriga, tanba ne’e nia nafatin husu traballadór sira mantein nafatin regra sira ne’ebé maka iha.
“Nafatin husu ba ita nia traballadór sira, sira rasik mak ohin lee ne’e hanesan komprimisu ida atu nune’e nafatin halo tuir regra iha ema nia rai labele koko atu sees husi sistema atu nune’e labele prejudika ba ita nia maluk sira ne’ebé hein hela, tuir hela teste atu ba servisu iha rai Australia”hakotu nia
Iha sorin seluk representante Sekretariu Estadu iha nia diskursu hatete, nia parte hakarak kongratula no agradese ba governu Australianu, tantu Publiku iha Australia no Timor-Leste tanba bele hakman ona sira nia ekonomia uma laran, no bele garante ona hodi hadia moris iha uma laran.
“Iha biban ida ne’e permite mai ha’u hanesan secretariu estadu Kooperativa SECoop Sr.Eng. Arsenio Pereira M. Agora ne’ebé mós atualmente hanesan mós Sekretariu estadu ein-exersisiu ba sekretaria estadu formasaun professional e Empregu (SEFOPE) nia naran hato’o IX governu konstituisional Liu-liu SEFOPE nia Parabens no agradese wain ba governu Australianu no entidades sira tomak tantu Publiku no privadu sira iha Australia no Timor-Leste ne’ebé halo esforsu oi-oin fasilita tiha ona ba ita nia alin Timor oan sira, atu ba servisu iha nasaun viziñu, Australia hodi buka netik bukae ruma ba moris di’ak sira nia rasik família no ein fin ba povo doben Timor-Leste nia ben-star mós” tenik nia
nia afirma tan katak traballadór sira tenke iha esperansa bo’ot ba iha nia rai rasik katak ,Timor-oan sira labele de’it ba servisu iha ema nia rai no labele sai de’it emrpregadu iha ema nia rai maibé tenke sai mós emrpregadu iha nia rai rasik, tanba nasaun no povo Timor-Leste Presija sira nia esperiensia atu investe fali iha ita nia rai rasik.
“Nune’e ha’u rasik ho imi nia família tomak povo no nasaun ida ne’e hein hela atu loron ruma saida mak imi hetan nu’udar imi nia esperiensia atu sai kontribuisaun di’ak ba ita nia Dezenvolvimentu ekonomiku iha futuru, atu iha loron ruma imi sira ne’e no ita nia jerasaun oin mai sai la’ós de’it emrpregadu iha rai liur ne’e maibé karik bele mós sai emrpregadu iha rain rasik, fiar no esperasna iha alin sira nia liman”Hakotu nia
Jornalista: Remigia Locateli
Editór : Varaka
