(Internasionál) Mudansa- Governu Reinu Unidu sei reativa Embaixada Británika iha Timor-Leste, nu’udar demonstrasaun klaru ba kompromisu Reinu Unidu nian atu haklean no haluan relasaun entre Reinu Unidu ho Timor-Leste. Anúnsiu ne’e sei halo durante vizita husi Ministra Reinu Unidu ba Indo-Pasífiku Anne-Marie Trevelyan iha Dili iha loron Sesta-feira, 1 Marsu 2024. Ministra Trevelyan hasoru malu ho Primeiru Ministru Xanana Gusmão no interlokutór sira seluk atu diskute asuntu sira ne’ebé relasiona ho relasaun bilaterál Reinu Unidu-TL. Ministra Trevelyan sei aprezenta komunikadu imprensa kona-ba reativa Embaixada Británika iha Dili.
Ministra Reinu Unidu ba Indo-Pasífiku Anne-Marie Trevelyan hateten:
“Ha’u senti kontenti tebes fila mai Timor-Leste no haksolok atu fahe informasaun furak kona ba intensaun atu reativa Embaixada iha Dili. Ida ne’e sei marka faze importante hodi haklean relasaun bilaterál, intensifika relasaun durante tinan rua ba kotuk, inklui vizita husi Prezidente Ramos-Horta ba Reinu Unidu iha Fulan Janeiru 2024.Ha’u hein ho ksolok atu hasoru malu ho Primeiru Ministru, ami-nia parseiru Timor-oan sira no interlokutór internasionál sira hodi diskute kona-ba dalan oioin atu Reinu Unidu ho Timor-Leste bele kolabora hamutuk hodi hari’i mundu ida di’ak liu.”
Embaixadór Reinu Unidu iha Timor-Leste Dominic Jermey hateten:
“Ha’u kontenti tebes katak Reinu Unidu anúnsiu intensaun ba reativa ninia Embaixada iha Timor-Leste. Iha tinan 24 liubá kotuk, ha’u estabelese dahuluk misaun Reinu Unidu nian ba Administrasaun Tranzisionál Nasoins Unidas iha Timor-Leste no ha’u orgullu katak Reinu Unidu, dala ida tan prova importánsia relasaun entre Timor-Leste ho Reinu Unidu liuhusi Embaixada foun ida ne’e.
Nasaun rua ne’e nu’udar belun ona iha tempu naruk, no Reinu Unidu sai ona uma ba Timor-oan lubun iha rai liur. Ita-nia prioridade sira ba dezenvolvimentu, polítika no seguransa aliña ona. Ami hakarak apoiu Timor-Leste atu kontinua dezenvolve hanesan nasaun ne’ebé estável no prósperu. No ami sei kontinua apoiu ba progresu Timor-Leste nian hodi sai membru kompletu iha ASEAN. Obrigado!”
Nota ba Editór sira:
Ministra Trevelyan sei aprezenta konferensia imprensa kona-ba reativasaun Embaixada Británika iha Dili iha loron Sesta-feira, 1 Marsu 2024, iha edifísiu Primeiru Ministru, hamutuk ho PM Gusmão.
Atu hetan informasaun klaru, favór kontaktu Ekipa Komunikasaun Média Embaixada Británika iha Jakarta: Xefi – Jeff Matthewman – +62 812 1091372 Xefi Adjuntu – Faye Belnis – +62 8118777 762
Komunikadu Imprensa
