(Dili) Mudansa – Sekretariu Jerál Rezistênsia Nasionál Estudante Timor-Leste (RENETIL) Joaquin Da Fónseca infórma, hakotu kontratu profisionál saúde hamutuk 2,256 iha munisípiu sanolu resin rua no laiha substituisaun kauza paraliza servisu atendimentu saúde ba populasaun iha territóriu laran tomak.
“Hakotu kontratu hamutuk nain 2.256 ba kontratadu ho termu los profisionais ba saúde sira inklui médiku, Enfermeirus, parteiras, tékniku aliadu sira seluk iha munisípiu 12 inklui iha Ospitál sira, no la iha substituisaun ka mekanismu seluk ruma atu garante atendementu saúde ba populasaun Iha territóriu tomak, nu’udar resultadu hosi asaun hira ne’e dadauk ne’e sistema saúde iha Timor-Leste paralizadu, Postu saude lubuk ida tenki taka tanba pesoál saúde la iha,” dehan Sekretariu Jerál RENETIL Joaquin Fónseca ba jornalista sira iha sede RENETIL Segunda ne’e, 15/01/2024
Sekretariu ne’e hateten, Sentru Saúde no Ospitál referál sira mós la iha ema natón atu fó atendimentu ba patiente sira, no pasiente barak hosi munisípiu sira haruka hotu mai Ospitál Nasional Guido Valadares (Sígla Portuges HNGV) no HNGV rasik mos labele fó atendimentu adekuadu, tanba pesoál saúde sira, ne’ebé iha ona experiensia tinan barak, hasai hotu sem substituisaun
Nia esklarese, alende aimoruk essensial sira no bens konsumiveis sira kuaze ‘out of stock iha instalasaun saúde sira, inklui iha HNGV, no hatún liu tan kapasidade atu fó atendimentu ba pasiente sira.
“Ita iha Timor-Leste ema hotu ko’alia kona-ba dignidade povo krítika ofisiál públiku sira, ne’e dehan hatun sira nia dignidade, ema kritika deputadu sira, neé dehan hatun deputadu sira nia dignidade, ofisiál estadu nian sa’e kareta bai-bain, ne’e dehan hatun sira nia dignidade, tenki sae Prado, tenki sai Pazero, para hasa’e dignidade, Ohin loron, sistema saúde kuaze paralizadu, sistema saúde la iha kbi’it atu fó atendimentu ba povo, ne’e ema ruma nia dignidade monu ka lae? Ema ruma moe ka lae? Ema ruma senti iha responsabilidade ka lae? neé ha’u husu ba ukun nain sira atu hatán,” Nia Hateten
Situasaun ida ne’e Sekretariu Jerál RENETIL Joaquin husu ba Governo atu fóti medida imediatu hodi rekruta pesoál saúde ne’ebé kualifikadu hodi prienxe fatin sira ne’ebé sei mamuk liuhosi kontinua kontratu ba profissional saúde sira, hodi normaliza prosesu atendimentu saúde ba sidadaun sira.
“Medida sira ne’e tenki inklui destituisaun ka substituisaun ba ofisiál sira ne’ebé okupa kargu xefia iha diresaun no instituisaun autonoma sira ne’ebé fóin mak nomeia, maibé la iha kualifikasaun natón atu hala’o ninia servisu, fóti medida urjente hosi aimoruk no bens konsumiveis sira ne’ebé dadauk neé out-of-stock iha Timor-Leste,” Nia Relata
RENETIL mós husu ba Komisaun F Parlamentu Nasionál atu halo fiskalizasaun lolos no mos ba Provedor Direitos Humanos e Justiça (PDHJ), atu hala’o analisa didi’ak hosi perspektiva direitu ekonomiku, sosiál no kulturál, ho doutrina realizasaun progressiva, atu identifika faktores ne’ebé kontribui ba degradasaun iha realizasaun direitu ba saúde.
“Renetil apela ba membru sira ne’ebé iha Governu, hosi Vice-PM, Ministru sira, to’o kompañeiru sira ne’ebé hala’o kna’ar tekniku oi-oin iha Ministeriu Saúde nia laran, atu fóti atendimentu saúde ba sidadaun ne’e hanesan knár sagradu ida ne’ebé ita bo’ot sira hala’o hanesan kontinuasaun ba misaun atu Liberta Povu, Hala’o ita bo’ot sira nia knár ho responsabilidade no komitimentu, ba sira ne’ebé mak halo parte ba Konsellu de Ministrus, lori asuntu ne’e ba diskuti hamutuk no fó solusaun ne’ebé adekuadu. Karik labele rezolve problema ne’e, di’ak liu ita bo’ot sira hakiduk de’it ona hosi ita bo’ot sira nia kargu,” Hakotu nia
Jornalista : Gaudência Belo
Editór : Veraka
