(Dili) Mudansa – Sekretaria Estadu Ba Igualdade (SEI) ho United Nations Fund for Population Activities (UNFPA) realiza Workshop ho ekipa multi-sektorál hodi Responde ba Violénsia Bazeia ba Jéneru (VBJ) ho nia tema “Hametin Sistema Rede Referál No Jestaun Kazu Ba Violénsia Bazeia Ba Jéneru Iha Timor-Leste”.
Sekretaria Estadu Ba Igualdade (SEI), Elvina Da Souza Carvalho hatete, prezensa iha workshop ne’e husi asosiasaun vitíma husi Portugál sira mai ho misaun ida atu halo analiza bele mós harre sistema referal no resposta ba iha vitima sira.
“APAV hanesan organizasaun ida ne’ebé tinan naruk haree ba vitíma no mós fó suporta ba bainhira sira hetan violénsia bazeia ba jéneru, sira nia prezensa mai apoiu ita hodi bele dezenvolve di’ak liu tan sistema apoiu vitíma ne’ebé maka iha, bazeia ba ita nia Planu Asaun Nasional VJB ne’e atu fó serbisu ka papel importante ba SEI hodi bele serbisu makaas iha prevensaun,” SEI, Elvina dehan ba Jornalista sira hafoin remata workshop iha Otel Timor, Sesta, 19/01/2024.
Tanba ne’e maka ohin ne’e, SEI hamutuk ho liña Ministerial sira hanesan Minísteriu Sosiál ho mós Minísteriu Saúde no Sosiedade Sivíl sira ne’ebé durante ne’e apoiu vitíma sira, importante mós parseiru UNFPA ho apoiu husi APAV mak hotu-hotu bele haree dezenvolve di’ak liu tan iha sistema no responde ida ne’ebé adekuadu no ida ne’ebé tau vitíma sira iha sentru atensaun ninian, tanba vitíma sira presiza atensaun ho resposta ne’ebé maka di’ak bainhira sira hasoru violénsia bazeia ba jéneru.
“Ami iha SEI, iha parte prevensaun atu dehan de’it katak SEI nafatin hala’o nia serbisu bazeia ba papel ne’ebé maka atribui mai ami, maibé ha’u sempre hatete iha fatin balu katak, papel ba iha ida ne’ebé hanesan atu apoiu vitíma sira ho serbisu saida de’it, la’ós serbisu iha Ministru maibé iha sistema referal ne’e buat hotu-hotu kompletu iha ne’ebá para sira bele halo sira nia serbisu,” Elvina argumenta.
Iha parte SEI mós sei haree lejislasaun ne’ebé presiza atu hadi’a, SEI bele avansa ho alterasaun ka proposta lei ruma para bele hadi’a mais por enkuantu SEI sei haree ou estuda lai tanba só iha lei maka bele implementa hodi hadi’a, ne’ebé ninia prosesu sei la’o hela.
Entretantu Reprezentante UNFPA iha Timor-Leste, Pressia Arifin Cabo subliña, Workshop ida ne’e ninia objetivu prinsipál maka atu identifika lakuna sira ne’ebé Timor-Leste iha sitema jestaun merkadu ou sistema apoiu vitíma.
“Entaun faktu agora ita serbisu barak hanesan saúde ho Justisa, serbisu sosiál entidade ida-idak ne’ebé hala’o sira nia serbisu kona-ba apoiu vitíma, maibé ita presiza iha koordenasaun ida ne’ebé di’ak liu iha setor hotu-hotu atu asegura vitíma sira, nune’e maka Workshop ne’e atu identifika lakuna sira ne’e hodi hadi’a,” Pressia Arifin Cabo dehan.
Nia aumenta, kona-ba labarik feto sai vitíma ba violénsia, dala ruma sira la hatene saida mak sira atu halo, entaun dala ruma sira ba iha polísia ou ba iha fatin seguru ba sira, maske sira hetan ona apoiu maibé parte daudauk ne’e bele ajuda tan sira kona-ba informasaun hanesan direitu ne’e saida no bele serbisu iha parte referal ninian.
“Entaun importante, nune’e maka ita nafatin apoiu ba sira no halo protesaun kontinuasaun ba vitíma sira ho mós sira bele ba fatin seguru, atu hetan protesaun di’ak ba vitíma sira iha forma mudansa balu iha lei hanesan kazu asaltu sexual no violénsia domestika, entaun sira tenke iha atensaun espesiál ba kazu asaltu sexual ou abuzu sexual, tanba kazu rua ne’e importante nune’e presiza tratamentu ne’ebé espesial, depois lei ida ne’ebé regula nia ho detalla,” nia hakotu.
Jornalista: Mariano Do Santos Abi
Editor: Felisberto F. Da Costa
