Intenasional Mudansa- Xefe Ekonomista, Ministeru Relasaun Exteriores (FCDO) husi Reino Unido, Professor Adnan Khan, hala’o vizita ba Timor-Leste iha loron 14-15 Dezembru 2023 hodi haduras kolaborasaun bilateral iha dezenvolvimentu ekonómiku. Vizita ne’e akontese hafoin, fulan rua liu ba Ministra FCDO ba Indo-Pasífiku, Anne-Marie Trevelyan, hala’o vizita ba Timor-Leste no sai hanesan Ministra UK primeiru ne’ebe vizita Timor-Leste depois independénsia iha tinan 2002.
Durante vizita ne’e, Professor Khan hasoru ho Governador Banku Sentrál Helder Lopes atu diskute kona-ba oinsa mak UK bele suporta iha setór servisu finanseiru iha Timor-Leste liu husi Programa Integrasaun Ekonomika ASEAN (AEIP), ne’ebé lansa iha inisiu tinan ida ne’e.
Iha fatin hanesan, Professor Khan mós hasoru ho Ministru Komérsiu no Indústria Filipus Nino Pereira no lansa projetu ne’ebé hetan finansiamentu husi UK hodi suporta adezaun Timor-Leste nian ba Komunidade Ekonomika ASEAN (AEC). Projetu ne’e sei ajuda Timor-Leste dezenvolve eskema sertifikadu orijen ne’ebé abranji nasaun tomak, ne’ebé sei benefisia esportadór lokál sira iha ne’ebé Timor-Leste dadaun ne’e buka integrasaun klean ba kadeia valor rejionál no globál nian. Lansamentu ne’e reafirma apoiu sustentavél ba Timor-Leste nia adezaun ba ASEAN.
Professor Khan mos halo palestra iha Universidade Nasionál Timor-Leste atu hamosu abordajen UK nian iha Dezenvolvimentu Internasionál, hanesan refletidu iha livru branku ne’ebé lansa ona ho naran “International Development in a Contested World: ending extreme poverty and tackling climate change”.
Xefe Ekonomista FCDO Profesor Adnan Khan Hatete :
“Hau kontente tebes atu mai Dili ba dala uluk hodi lansa projeitu importante ida ne’e. Timor-Leste halo ona passu boot liu iha adezaun ba Organizasaun Komersiu Mundial (OKM), no agora UK tenki fo apoiu ba Timor-Leste atu asesu ba ASEAN.”
Emabaixadór UK ba Timor-Leste Dominic Jermey dehan:
“Reino Unido komprometidu atu haklean liu tan parseiru ho Timor-Leste, no hau kontente katak Xefe Ekonomista FCDO Professor Adnan Khan vizita Dili foin dadaun ne’e atu diskute dalan hodi dezenvolve kolaborasaun. Lansamentu ba projetu Adezaun Komunidade Ekonomika ASEAN hatudu komitmentu ita nian atu fo apoiu ida ne’e hodi Timor-Leste bele asesu ba ASEAN ho di’ak . Ami hein projetu ne’e bele benefisia ba ekonomia Timor-Leste.”
Embaixadór UK ba ASEAN Sarah Tiffin deklara:
“Hanesan parseiru dialogu ASEAN nian ne’ebé di’ak, UK kompromete atu ajuda Timor-Leste iha prosesu adezaun ba ASEAN. Vizita husi Xefe Ekonomista FCDO Professor Adnan Khan ba Timor-Leste no inagurasaun projeitu ne’ebé finansiadu husi UK atu fasilita adezaun Timor-Leste nian ba projetu Komunidade Ekonomiku ASEAN nia hanesan demostrasaun komitmentu konkretu .
Ministru Komérsiu no Indústria, S.E. Filipus Nino Pereira hatete,
“Hau hakarak agradese ba governu UK ba sira nia apoiu. Projeitu ida ne’e sei ajuda ami hodi kumpri rekezitu adezaun ba ASEAN no OKM. Iha inisiativa ne’e mos reflete ami nia komitmentu ba diversifikasaun ekonomia no hadaek intégrasaun ekonómika rejionál.”
Ba informasaun klean, halo favor kontaktu Komunikasaun no Média Embaixada Británika Jakarta, Faye Belnis – +62 8118777 762
Press Release
