(Bobonaru) Mudansa – Negosiante iha Maliana sente haksolok no apresia ba governu da sia liu husi Sekretariu Estadu Arte Kultura servisu hamutuk ho Centru Nasional Chega ne’ebé realiza ona eventu Festival Fronteira 2023 iha Maliana Bobonaru tanba ajuda tebes negosiante sira hetan rendimentu di’ak.
Hanesan mós Negosiante Regina Monis informa, nia parte sente kontente ba Governu da sia nia programa ne’ebé realiza eventu Festival Fronteira 2023 Loke feira ba negosiante sira atu halo negósiu iha eventu refere.
“Hau agradese tebes ba governu tanba bele loke ona eventu boot hanesan ne’e hodi bele ajuda ona ami negosiante ki’ik sira, tanba iha eventu nee ami bele hetan rendimentu di’ak,” Dehan Ngosiante Regina Monis ba Jornalista média mudansa iha Gor Maliana Bobonaru, Sabadu, 19/11/2023.
Nia afirma, durante loron hirak ne’e udan boot maibé nia nafatin kontente tanba hetan rendimentu di’ak husi kompradór sira maski Regina faan deit, pop mie, mantolun, Mie Sedaap, no sasán kios nia seluk tan.
“Ba maluk negosiante sira seluk mak ha’u la hatene, pesoál ha’u Durante loron tolu fa’an sasán iha ne’e kada loron ha’u hetan rendimentu $.30.00 ou sa’e ba $.40.00 tanba ne’e ha’u sente kontente loos ho ita-nia governu ne’ebé loke ona eventu boot hanesan ne’e,” nia apresia.
Nia relata, osan ne’ebé nia hetan husi negósiu ne’e uza ba nesesidade loroloron no mós rai hela ba oan sira nia estudu tanba balu foin iha banku Ensinu Baziku no Ensinu sekundária.
“Ha’u ho oan sira buka moris tanba ha’u feto faluk ne’ebé ha’u tenke fa’an sasán nune’e bele sustenta ba oan sira nia presiza iha eskola, balun uza ba nesesidade uma laran nian no balu sosa fali sasán nune’e bele kontinua ami nia negósiu ne’e,” nia deklara.
Faluk Regina esplika, negósiu ne’ebé dadaun ne’e nia halo la’ós uza rasik ninia osan maibé impresta ka kredit de’it iha Instituisaun Moris Rasik, iha ne’ebé inísiu halo kréditu nia fó uluk $.50.00 kada semana no mós estor ka selu fali kada fulan $.12. 00.
“Hau foti uluk iha Kaebauk tanba sira loke sentru iha ha’u-nia uma durante tinan 7 mak ha’u uza osan husi Kaebauk ne’e hodi fila liman depois ha’u para tiha iha Kaebauk kontinua fali impresta iha MORIS Rasik to’o agora ha’u uza ida ne’e hodi halo negósiu suporta oan sira nia estudu no nesesidade uma laran,” nia konta.
Negosiante Regina orijen husi Suku Holsa Postu Administrativu Maliana Munisipiu Bobonaru, Inan faluk Regina esforsu an buka moris atu hatutan moris maski feto faluk maibé la sai barreira ba nia atu halo negósiu hodi hetan finanseiru uitoan atu oan sira la bele tane liman ba ema seluk.
Jornalista : Esperança Monteiro Soares
Editór : Orlando Magno
