NoDili) Mudansa – Prezidente Repúblika (PR), José Ramos-Horta halo inaugura pixina modernu automátiku ba públiku liuliu ba labarik sira, ne’ebé oferese husi empreza Shangai Construction Group Xina iha Palásiu Prezidensiál, Nicolau Lobato, Bairo-Pite.
Xefe Estadu José Ramos Horta informa, ohin inaugurasaun pixina kompletu ho hariis fatin ba labarik sira, pixina ne’e nu’udar ho nia sistema automátiku.
Oinsa hamos automátikamente pixina, la presiza ema ruma atu hamoos tanba iha pixina ida tenke iha tratamentu, se lae bele afeta moras kulit, portantu ne’e sistema modernu iha tratamentu limpeza automátiku.
PR Horta realsa, depois sei tau labarik feto rua (2) ou tolu (3) iha ne’e para tau matan ba labarik sira liuliu hanorin sira kona-ba hariis nian, oinsá atu utiliza hariis fatin ne’e no ajuda labarik sira hodi komprende saida maka sintina no sasán ne’ebé iha pixina ne’e.
“Ha’u ko’alia ona ho kompañia Xina atu halo mahon ida iha pixina leten, tanba labarik sira loron tomak, la hanoin loron manas boot, iha bee laran tanba sira hanoin fresku hela,” Xefe Estadu dehan hafoin Inaugura Piscina Modernu Automátiku ba Públiku, iha resintu Palásiu Prezidensiál, Sesta 24/11/2023.
Xefe Estadu haktuir, iha tan projetu seluk, sei haree bairru sira hanesan kampu futsal iha Largo Lecidere no sei halo iha bairru balu tan, ne’e ho Minísteriu Juventude, Desportu, Arte no Kultura (MJDAC sigla Portugés) maka sei haree rai no ko’alia ho Embaixadór Xina hodi sira halo tan buat simples.
“Ha’u agradese ba Governu Xina tanba iha fulan hirak liu ba, ha’u hatete kedas atu halo karik lalika pixina ida normál, maibé ida ne’e hotu-hotu haree hanesan númeru 8 ou letra Z, nune’e mós kalan iha kontrola automátiku ho kór oin-oin,” PR Horta informa.
Aleinde kona-ba orsamentu ba pixina refere, parte Xefe Estadu la hatene, mais agora Xefe Estadu ho kompañia ko’alia hela atu loke tan iha fatin seluk, depois tenke halo jestaun di’ak no edukativu ba labarik sira hodi oinsá hatene uza hariis fatin tanba iha ne’e feto ho mane.
Iha fatin hanesan, Emabiaxadór Xina, Wang Wenli, sente kontente tebes bele partisipa iha serimónia hodi entrega ofisialmente pixina ida ne’e ba Governu Timor-Leste em nome Governu China.
“Hau sente kontente ho Prezidente ida ne’ebé ho labarik sira nia hakarak no ohin sai realidade ona, tan ne’e lori Governu China iha Timor-Leste atu serbisu hamutuk ho Governu Timor harii projetu ida ne’e,” nia hatete ho laran ksolok.
Tanba ne’e, ho inisiativa Prezidente Repúblika China ho Timor-Leste hamutuk deside atu hadi’a relasaun entre nasaun rua ho parseria estratéjia ne’ebé komplexivu, parte rua kooperasaun prátika.
“Ha’u espera, labarik sira sente no goza rezultadu husi kooperasaun entre nasaun rua ne’e no sai partisipante kontribui ba amizade entre nasaun rua nian iha futuru,” nia deklara.
Aleinde ne’e Wang agradese tebes ba Constructed by: Shanghai Construction Group ne’ebé dezana furak no konstrusaun ne’ebé exelente hatudu kapasidade sólidu no modelu di’ak ba empreza China sira.
Jornalista : Mariano Do Santos Abi
Editór : Orlando Magno
