(Dili) Mudansa – Reuniaun Konsellu Superior Defeza no Seguransa (KSDS), prezide husi Prezidente Repúblika (PR), José Ramos-Horta, ne’ebé koalia kona-ba oinsá atu trata asuntu seguransa no defeza soberania iha rai laran maibé rezultadu husi reuniaun refere sai segredu ba membru sira atu la bele fo sai ba publiku.
Portavoz KSDS, João Apariçio Guterres, reuniaun ne’e, la’ós públika tuir lei, tan ne’e rezultadu ne’ebé ohin foti iha reuniaun refere la bele fó sai, tanba membru hotu-hotu hakruk ba lei, entaun la bele fó sai buat tolu mak hanesan objetu, konteudu ho ninia deliberasaun.
“Objetu siknifika asuntu importante ne’ebé trata iha reuniaun refere la bele fó sai, maibé entre membru sira hotu bele halo analiza kle’an liu ba kestaun ne’e, no konsidera katak, importante teb-tebes ba seguransa, defeza no ba soberania rai laran ninian,” Portavoz KSDS, João Apariçio Guterres dehan iha Palásiu Prezidensiál, Bairo-Pite.
João afirma, Konteudu ne’e refere ba konjuntu de volores, prinsipiu, koñesimentu, kapasidade ho kompetensia ne’ebé membru sira hotu kumpri tuir lei hodi garantia estabilidade no paz iha nia rai laran.
Nia deklara, Konsellu Estadu hanesan orgaun konsultivu Prezidente Repúblika nian ba asuntu polítiku, bazeia ba Konstituisaun RDTL artigu 90 – 91 no mos Konsellu Superiór Defeza no Seguransa hanesan orgaun konsultivu ba asuntu soberania, bazeia ba Konstituisaun RDTL artigu 48.
Jornalista : Mariano Do Santos Abi
Editór. : Orlando Magno
