(Dili) Mudansa – Cámara Cómercio Indústria Timor Leste (CCI-TL), realiza semináriu Asembleia Jeral Anual Ordinaria ba tinan 2023 ko’alia kona ba planu anuál CCI-TL nian, liga ba atividade emprezáriu no ekonomia iha rai laran.
Prezidente CCI-TL Jorge Serano informa, relasiona ho Asembleia Jeral ida ne’e CCI-TL atu diskute kona-ba planu anuál no planu avaliasaun ne’ebé durante ne’e CCI-TL halo ona liu liu iha atividade emprezáriu no setór ekonómiku iha rai laran.
“Asembleia ida ne’e, hakarak emprezáriu ki’ik no emprezáriu boot atu halo diskusaun kona-ba planu ne’ebé durante ne’e sira halo ona, hodi responde ba nesesidade rai laran liu liu ekonomia, negósiu no empregu tanba númeru dezempregu sei boot iha rai laran,” dehan Prezidente CCI-TL Jorge ba jornalista iha Salaun Delta Nova Dili, Sexta 17/11/2023.
Nia esplika, hakarak ekonomia iha rai laran la’o ho di’ak presiza ema hotu nia esforsu no responsabilidade, emprezáriu sira halo sira nia knaar negósiu bele prodús buat balu iha rai laran maibé merkadu mós importante.
“Governu halo desizaun polítika ba ida ne’e kona ba atividade ekonómika no emprezáriu se mak atu asegura tanba ne’e mak CCI-TL implementa ida ne’e atu ajuda emprezáriu sira hodi dezenvolve ekonomia iha rai laran,” Prezidente Jorge relata.
Iha fatin hanesan Sekreráriu Estadu Koperativu (SEKOP) Arseno Pereira argumenta, setór ekonomia iha Timor Leste ne’e la’o di’ak tenke investe maka’as ba setór produtivu sira nune’e bele rezolve hodi halo redusaun ba dezempregu iha rai laran.
“Ha’u hanoin setór ida ne’e importante tebes atu ekonomia ne’e la’o di’ak maibé iha papél ida importante liu mak iha setór privadu, atu halo redusaun ba dezempregu iha Timor Leste tenke investe mós ba setór produtivu nune’e kresimentu ekonomia bele sa’e,” tenik Arseno.
Iha sorin seluk, Governador Banko Comérsiu Timor Leste (BCTL) Helder Lopes hatutan, osan ne’ebé sai ba li’ur barak liu duke osan iha rai laran tanba lakohi prodús iha rai laran no la bele absolve nune’e osan tenke sai barak.
“Osan ne’ebé sai ba li’ur sosa sasán de’it ne’e besik biliaun 1 tanba ita lakohi prodús iha rai laran se ita mak iha kbiit atu absolve osan ida ne’e sei sirkula iha ita-nia rai maibé ha’u sente ekonomia rai laran bele buras liu ,” Helder deklara.
Nia haktuir, Kontribuisaun setór privadu ba ekonomia iha Timor Leste ki’ik tebes tanba iha 2022 menus husi 30% signifika ekonomia agora nia baze la’ós investimentu iha setór privadu maibé ho defeza estadu nia Kreditu husi banku ba setór privadu sei ki’ik 20% ida ne’e menus liu ba média kréditu ba setór privadu iha illa pasífiku sira.
Jornalista : Domingas Viana
Editór : Orlando Magno
