(Dili) Mudansa – Nu’udar ema umanu bainhira moris ona iha mundu ida ne’e, presiza hatutan moris liu husi atividade oioin nune’e bele responde ba nesesidade loroloron.
Tuir realidade ne’ebé hatudu katak, iha ema balu atu hatutan moris presiza hala’o ninia atividade iha oras madrugada maski ema balu sei deskansa (Toba) maibé inan feto ida hakarak liu hala’o nia negósiu iha oras madrugada oinsá bele hetan netik sentavus ida.
Situasaun ne’e reflete ba Negosiante Franscisca Martins ne’ebé halo negósiu (fa’an) malus ho Bua hahú tuku 03:00 madrugada tanba iha pasajeiru barak mak husi Dili atu ba ida-idak nia munisípiu ho nune’e Francisca deside fa’an sasán hahú husi oras madrugada to’o tuku 08:00 kalan.
“Tuku 03:00.otl. madrugada Ha’u sai husi uma mai fa’an iha Terminal Tasi Tolu tanba dadeer ne’e ema barak mak sosa sasán tanba ne’e aproveita mai nakukun atu ema sosa netik, se tuku 08:00 dadeer-saan mak mai iha merkadu entaun ema la sosa maski tuur to’o kalan,” dehan Franscisca ba jornalista Média mudansa iha Tasi Tolu Dili kinta feira 12/10/2023
Nia haktuir malus ne’ebé mak nia fa’an, sosa tutan husi ema seluk ho osan $.4.00 hafoin nia fa’an fali ida ki’ik folin $.0.25 no boot $.0.50 maibé kona-ba rendimentu depende vontade no pasiénsia tanba tempu di’ak ema sosa barak bele to’o $.20.00 maibé tempu aat dala ruma ema la sosa.
Nia konta, antes ne’e Francisca fa’an sasán barak iha Tasi Tolu maibé muda tiha fatin entaun agora nia deside hodi mai tuur iha loja nia oin hodi fa’an de’it malus ho bua oinsá bele responde ba ninia nesesidade loroloron nian hodi hatutan moris ba loron aban.
“Diak liu ha’u tuur iha ne’e hodi fa’an sasán duke ha’u ba fa’an iha merkadu ema la haree no ema la sosa to’o malus sira dodok de’it ami soe estraga entaun ida ne’e halo ami lakon osan,” dehan nia
Negosiante Franscisca Martins orijen husi munisípiu Aileu postu administrativu Remexio no mós nia iha oan na’in neen kompostu husi feto 3 no mane 3 entre na’in 6 ne’e iha na’in 5 forma ona uma kain no na’in 1 mak sei eskola.
Iha fatin hanesan negosiante Olandina Soares husi munisípiu Ermera argumenta, moris la bele depende de’it ba ema seluk maibé tenke buka meius ida oinsá bele hetan osan Osan liu husi atividade oioin inklui halo negósiu ki’ik hanesan dadaun ne’e nia halo.
“Diak liu buka moris hodi hatutan moris liu husi fa’an sasán ki’ik sira ne’e hodi bele kompleta netik ha’u-nia nesesidade loroloron, tanba Ita tuur de’it iha uma susar atu hetan osan,” nia deklara.
Olandina esplika, fa’an sigarru hanesan mós buka sorte oinsá bele hetan netik osan uitoan hodi responde ba nesesidade uma laran ne’ebé presiza, tanba sorte di’ak loron ida ema sosa barak maibé dala ruma mós ema la sosa,” nia konta.
“Hau nunka sente kolen no baruk maski rai rahun suar maka’as no loron manas mós ha’u nafatin fa’an tanba hela iha sidade Dili buat hotu presiza osan entaun obrigatóriu ita tenke buka osan labele hein de’it família sira atu fó osan ba ita,” nia hakotu.
Jornalista :Domingas Viana Editor : Orlando Magno
