(Dili) Mudansa – Minísteriu Saúde (MS) hamutuk ho World Vision Timor-Leste (WVTL) no United Nations Children’s Fund (UNICEF) realiza sorumutu advokasia ba implementasaun integrasaun vasina Covid-19, hodi haforsa imunizasaun rutina ba Munísipiu neen(6)
Diretóra Jerál Prestasaun Saúde, Odete da Silva Viegas informa, iha pasu importante serbisu hamutuk ho WVTL no UNICEF, ne’ebé apoiu finanseiru husi Governu Austrália liu husi Department of Foreign Affairs and Trade (DFAT) hodi haree ba imunizasaun ho rutina ba Munísipiu Aileu, Baucau, Bobonaro, Covalina, Ermera no Manatuto
La’os ne’e de’it maibé WVTL ho UNICEF mós suporta ba iha serbisu nutrisaun, saúde ambientál nian ho promosaun, oinsá bele habelar liu tan informasaun ba komunidade sira para bele hatene importánsia husi vasina ne’e rasik.
“Serbisu sira ne’e ita tenke fó ho integradu, haree mós ba programa importante seluk ita tun ba baze la’o ho pakote hodi haree ba imunizasaun, saúde materna infantíl, nutrisaun, saúde ambientál ne’ebé moris iha komunidade nian,” dehan Diretora Jerál Odete ba Jornalista iha Salaun Lider Ship City8, Manleuana, Kuarta 23/08/2023.
Nia subliña, antes hahú kampaña ou promosaun ba inan feton sira iha komunidade hodi reforsa iha área prevensaun ho promosaun nian, tanba dala barak sira ladún fó importánsia imunizasaun ba sira nia oan entaun profisionál saúde atu kria mekanizmu ne’ebé adekuadu no pertinente ba komunidade sira.
“Sita uitoan kona-ba mekanizmu ne’e koordenasaun komunikasaun iha baze tenke ho forsa, tanba dala ruma ami observasaun mekanizmu koordenasaun ladún forte. Dala ruma profisionál saúde sira tun ba baze, ita-nia komunidade no lider komunidade sira la hatene informasaun,” nia afirma.
Diretóra Odete realsa katak, maibé MS serbisu hamutuk ho parseiru Ajénsia sira hanesan, DFAT, WVTL ho UNICEF bele haforsa liu tan prestasaun serbisu iha MS, ho ida ne’e MS la serbisu mesak maibé ho ekipa.
Iha fatin hanesan Diretór Nasionál WVTL, Jered Berends hatete, WVTL nu’udar organizasaun ida ne’ebé iha dedikasaun boot atu serbisu, hodi mellora bein estár labarik sira nian.
Tanba WVTL nia Vizaun ba Timor maka “Labarik Saudavel, Kommunidade Forte” agora hala’o serbisu iha Aileu, Baucau, Bobonaro, Covalima, Ermera no Manatuto.
Tanba ne’e WVTL agradese ba MS ba ninia suporta ba projetu atuál no kontinua haree no hein oportunidade, serbisu hamutuk, hodi garantia “Labarik Saudavel no Komunidade Forte” iha Timor-Leste.
“Ami kompremitidu hodi kontinua serbisu ho Ministériu sira no parseiru sira, espesialmente Ministériu Saúde, hodi lori mudansa sustentavel ba saúde liuliu ba komunidade sira ne’ebé vulneravel liu,” Jered Berends dehan.
Nia haktuir, Foin dadaun iha fulan Maiu, WVTL no UNICEF halo parseria iha fundus DFAT ba projetu Vaccine Acces and Health Security Initiative (VASHI), hodi suporta Ministériu Saúde atu hasa’e kobertura imunizasaun liu husi integrasaun Vasina Covid-19 no Rutina liu husi WVTL nia aproximasaun bazeia ba komunidade
Enkuantu WVTL nia programa ezistente iha munisípiu 6 ho kobre suku atus ida (100), ho durasaun tempu tinan ida hahú iha fulan Junu tinan 2023 to’o Junu 2024.
Tuir observasaun Média Mudansa iha sorumutu ne’e, partisipa iha husi Diretora Jerál Ministeriu Saúde, Diretór Nasionál Sira, Diretór Saúde husi Munisipál sira, reprezentante husi DFAT, reprezentante husi UNICEF, reprezentante husi Organizasaun Mundiál Saúde (OMS) no Organizasaun Sosiedade Sivíl.
Jornalista : Mariano Do Santos Abi
Editór : Orlando Magno
