(Likisa) Mudansa – Fa’an ikan hanesan servisu ida ne’ebé negosiante sira halo hodi hetan osan sustenta nesesidade loroloron nian la’os hein de’it governu mak tenke fó servisu.
Negosiante Agida dos Reis Soares hateten, nia parte sente kontente bainhira hala’o negósiu ikan tanba nia rasik konsidera fa’an ikan di’ak liu kompara ho servisu iha kantór hein fulan mak simu saláriu.
Negosiante ne’e hahú hala’o negósiu liu husi fa’an ikan no masin rai hahú husi 2018 mai to’o agora hodi sustenta nesesidade moris família nian no selu oan sira nia eskola.
“Ami toman ona ho fa’an ikan no masin rai tanba loron ida bele hetan rendimentu ho montante $.50.00 to’o $.70.00 bele sosa foos no mina ba família sufisiente hela, ida ne’e ha’u sente di’ak liu kompara ho servisu iha kantór hein fulan mak simu saláriu” dehan Negosiante Agida dos Reis Soares ba jornalista Media Mudansa iha Tibar tersa,(22/08/23).
Negosiante ne’e akresenta, hanesan vendedór toman liu ho atividade fa’an ikan maski iha kompañia balu ba servisu maibé nia (Agida) lakohi tanba fulan mak simu saláriu.
Vendedór Agida afirma, ikan ne’ebé fa’an sosa tutan husi peskadór sira husi Atauru, tempu udan ikan barak balde Aries ida ho presu $.50.00, maibé tempu agora ikan menus no folin mós sa’e ba $ 70.00.
“Ami kontente tanba ema uitoan de’it mak fa’an to’o lokraik no ikan ne’ebé lori mai fa’an iha ne’e butuk ida ho folin $.5.00 to’o ikan ne’e hotu ami hetan dolar 20 maibé la konta ho osan inan.” Nia salienta
Nia relata, bainhira ikan laiha entaun Aida ho nia oan sira kontinua prodús masin rai nune’e bele kontinua halo negósiu atu la bele estraga tempu.
“Hela iha tasi ninin, ami nia servisu mak fa’an ikan no masin rai, buat seluk laiha,” nia deklara.
Negosiante Agida dos Reis Soares ho idade 39 iha oan na’in 3 kompostu husi feto ida no mane na’in rua, hela iha aldeia Fatunia Suku Tibar postu Administrativu Bazartete Munisipiu Liquica.
Jornalista : Delfina Borges
Editór : Orlando Magno
