(Likisa) Mudansa – hatutan moris la’os dependénsia ba ema seluk maibé presiza esforsu an liu husi maneira oioin hodi hetan lukru haforsa nesesidade uma laran tanba atu hetan sentavus ida la’os tuur de’it sem halo buat ida.
Asuntu ne’e reflete ba Negosiante Marta Soares ho tinan (56) Husi Aldeia Naunil Suku Ulmera postu administrativu Bazartete munisípiu ne’ebá moris loroloron depende de’it ba negósiu ki’ik hodi kompleta nesesidade loroloron nia inklui mós selu oan sira nia estudu.
Marta sente kontente bainhira hetan fatin negósiu besik Estrada públiku tanba ema barak halo movimentu hodi sosa ninia produtu ne’ebé nia fa’an.
“Ita tenke esforsu an maka’as liu husi fa’an sasán ki’ik oan sira atu bele hetan netik dolar ida hodi sustenta ba nesesidade loroloron nia inklui mós selu oan sira nia eskola,”dehan Marta ba jornalista Média mudansa iha Aldeia Naunil suku Ulmera tersa feira 22/08/2023
Nia haktuir maski ho idade ne’ebé aumenta ba beibeik maibé nia nafatin iha vontade hodi halo negósiu maski sente loron manas rai rahun barak maibé nia nafatin kontente hodi halo nia negósiu refere.
“Ha’u lakohi tuur de’it iha uma maibé ha’u tenke fa’an sasán maski natoon tanba liu husi fa’an sasán maka ita bele hetan dolar bainhira sente kolen deskansa oituan depois mak kontinua fa’an fali,” konta Marta
Negosiante plástiku ne’e haktuir, hahú halo negósiu ne’e iha tinan 2010 to’o ohin loron antes ne’e nia fa’an uluk bua ho malus maibé para entaun nia konsege fa’an fila fali masin ho budu tasi no sukaer.
Masin ne’ebé nia fa’an, plastik ida ho nia folin $.1.00, sukaer ho budu tasi nia folin $0.50 no sasán hirak ne’ebé nia fa’an sosa tutan husi ema seluk.
“Sorte di’ak loron ida ema sosa to’o $.5.00 to’o $.6.00,sorte la iha loron ida ema sosa de’it $.2.00 lae ,$ 3.00 de’it Buat sira ne’e hotu tuir nia tempu, maibé ha’u kontinua fa’an nafatin hodi sustenta uma laran no selu oan sira nia eskola,”nia afirma.
Negosiante Marta iha oan na’in neen kompostu husi feto ida no mane lima nune’e mós nia hahú halo negósiu iha tinan 2010 to’o ohin loron
Jornalista : Domingas Viana
Editór : Orlando Magno
