(Dili) Mudansa – Governu liu husi Serviço de Apoio á Sociedade Civil e Auditoria Soclçial (SASCAS) apoiu orsamentu ho montante dolar amerikanu rihun 50 ba projetu Memoria Viva.
Tanba Asosiasaun Eis Prizoneiru Polítiku Timor-Leste (ASEPOL) halo atividade ida, depois rekolla memória husi prizioneiru polítiku sira, iha Dili ba to’o munisípiu.
Ne’ebé tau no hatama hotu ona ba Serbisu Verifikasaun Emprezariál, Institutu Públiku (SERVE, I.P) hanesan oportunidade hodi halo lansamentu ho ASEPOL nia projetu naran Memoria Viva.
Governu liu husi Diretór Ezekutivu SASCAS, Edvin Duarte Soares Noronha informa, SASCAS nu’udar servisu ida ne’ebé tutela irakiamente ba iha Primero Ministru no iha momentu ida ne’ebé SASCAS fó apoiu orsamentu 50 míl, ba serbisu ASSEPOL nian.
“Primero hahú ona fortifika sistema governativa organizasaun nian, tanba ne’e ita presiza instala ekipamentu no mós ema ne’ebé asumi knaar atu halo serbisu, no mós hahú ona halo deskobrimento ba istória filmajen no dokumentasaun ba veiu ou dadur atan sira,” dehan Diretór Ezekutivu SASCAS, Edvin ba jornalista iha salaun CNC,I.P, Balide, Sesta (07/07/2023).
Nia akresenta, ohin loron deskobrimentu sira ne’e sai hanesan rekursu boot ida ba ema hotu no publika tomak, tanba na’in ba istória ne’e sei iha, maibé susar ba ema ida-idak atu konta tuir nia hakarak, entaun istória ne’e mai ho nia faktu kedas.
“Ho ida ne’e, autór ka na’in ba iha istória ne’e iha, ita mós hatene na’in sei barak,” Diretór Ezekutivu SASCAS, Edvin afirma.
Nia relata, iha organizasaun ne’ebé halo istória ba konservasaun, mak ASEPOL, KMST no mós organizasaun RENETIL, OBTIL, OBJELATON, SAGRADA FAMÍLIA inklui Nukleu Rejistensia ho seluk tan ne’ebé hahú ona memória partisipasaun luta ba libertasaun nasionál.
“SAGRADA FAMÍLIA hahú konta no hakerek sira nia istória rasik kona-ba partisipasaun luta ba libertasaun no RENETIL mós ohin loron iha livru ho títulu SEBTITRO DOQUE SINPATRE tanba sira mós halo ona dokumentasaun ba libertasaun nasionál,” Diretór Ezekutivu SASCAS, Edvin afirma.
Nia konta, iha serbisu lubuk ida mak husu sira oinsá atu halo movimentu haksolok ba Timor-Leste nia sosiedade, oinsá komunidade iha hahán natoon no saúde di’ak.
Aleinde ne’e mós iha Konferénsia Sientífika Centro Chega! 2023, atu hamosu diskusaun teoria no metodolójika ou prátika kona-ba peskiza istória komunidade nian, hodi bele melloria implementasaun atividade komunidade nia istória ida ne’ebé Centro Chega! introdús ona dezde tinan 2019.
Iha fatin hanesan, Atuál Prezidente Asosiasaun Prizoneiru Polítiku, Jacinto Das Nevez Raimundo Alves hatete, ASEPOL halo atividade iha memória viva ne’e bele sai hanesan istória reál hodi tranzmite ba jerasaun sira hotu kona-ba luta ba independénsia.
oinsá sira sustenta luta ne’e, oinsá sira suporta ba operasaun hotu-hotu, simu todan hotu-hotu ne’e no oinsá sira la lakon sira nia fiar ba vitória funu ninian, mezmu moris iha situasaun ida ne’ebé esperansa kuaze la iha.
“Valór sira ne’e hakarak tranzmite ba públiku liuliu ba ita-nia joven sira, atu buka hatene no komprende katak funu ita nian ne’e la’ós funu ida simples,maibé iha nia komplesidade tomak kuandu mundu tomak haluha tiha ona ita,” Jacinto akresenta.
Nia hakle’an, prizioneiru sira nia atividade iha Frente Klandestina mai to’o iha dadur tanba mundu la bele haluha katak, povu ida ne’e seidauk hetan nia direitu ba autodeterminasaun.
“Mezmu sira lori ida ne’e desterra ba ita-nia funu kontinua nafatin, ne’e mak husi fotografia prizaun sira ho ema sira ne’ebé dadur tanba ne’e ami sei kontinua nafatin, espera katak ami rekolla hotu kedas,” nia realsa.
Portantu iha ne’e haree tuir prizaun, nia períodu ba ema ne’ebé dadur iha fatin fatin sira ne’e. Klaru katak, ida ne’e hotu presiza orsamentu husi programa memória vivu.
Jornalista : Mariano Do Santos Abi
Editór : Orlando Magno
