(Dili) Mudansa – Professores Munisipiu Dili ezije direitu Saláriu, tanba profesores iha territóriu Timor laran ne’ebé asina kontratu ho Governu iha fulan Abríl tinan 2023 hala’o knaar hanesan Profossores kontratadu. Maibé to’o agora seidauk hetan saláriu.
Husi ezijénsia ne’e profesór kontratadu sira promete katak karik iha semana ida nia laran la iha resposta sira sei halo audiénsia dahuluk ho Ministeriu Edukasaun (ME), Primeiru Ministru (PM) no Parlamentu Nasionál (PN).
“Ami husi profesór voluntáriu ne’ebé mak asina kontratu iha fulan Abríl tinan 2023, atu dehan de’it katak kuaze fulan haat (4) ona maibé ami nia saláriu seidauk tama,” Portavoz Agustino da Costa Belo hatete liu husi Konferénsia Imprensa iha Largo Lecidere, Segunda (10/07/2023).
Agustino haktuir, tanba ne’e sira husu ba Primeiru Ministru (PM) no Ministeriu Edukasaun (ME) hodi prosesa profesór kontratadu nia saláriu, tanba sira hotu kontribui no uniforme ona jerasaun foun liu husi edukasaun formál iha tempu barak nia laran, ne’ebé la sente kolen.
“Karik la resposta kona-ba ami nia asuntu ida ne’e, ami sei kontinua marka audiénsia ho ME, depois kontinua ba PM no kontinua ba Komisaun G iha Parlamentu Nasionál (PN) ne’ebé haree ba Asuntu edukasaun nian,” Portavoz Agustino deklara.
Nia aumenta, antes ne’e mós Diretór balu hatete, tuir regra kontratu foun minimál fulan tolu masimal fulan neen, maibé agora kuaze fulan haat ona, saláriu seidauk iha.
“Foin daudauk ami asina kontratu ne’e kada fulan hetan dolar amerikanu 272 USD husi Ensinu Báziku to’o Ensinu Sekundaria, maibé kuaze fulan haat ona seidauk simu, tanba osan la tama iha ami nia konta bankária,” Tenik nia
Nia akresenta husi saláriu ne’e profesór kontratadu sira bele uza ba nesesidade loroloron molok ba eskola hodi kontinua ajuda forma oan sira ba futuru nasaun Repúblika Demokrátika Timor-Leste (RDTL).
“Ami kontratadu ne’ebé iha territóriu Timor laran hamutuk 1.500 ne’ebé mak foin daudauk ne’e ami asina kontratu to’o ohin loron seidauk simu saláriu,” Portavoz Agustino relata.
Sira nia esperansa ho mandatu IX Governu sei kontinua manorin sira nia kontribuisaun nu’udar rekursu ne’ebé iha kualidade atu hanorin kanorin sira ne’ebé ba futuru nasaun RDTL.
Enkuantu Profesór sira iha eskola Dili laran ne’e maka SACROJES, Herois da Pátria no Eskola Sekundaria Jerál sira iha Dili laran ne’e hotu, depois sira nia maluk Munisípiu seluk sei kontinua ba preokupasaun ne’e.
Jornalista : Mariano Do Santos Abi
Editór : Orlando Magno
