(Dili) Mudansa – Centro Naçional Chega, Instituto Público (CNC, I.P) asina akordu ho Organizasaun internasionál Community Housing Limited (CHL) liu husi prevee Orsamentu Jerál Estadu (OJE) $. 50.000.00 USD, atu harii uma ne’ebé saudavel no seguru ba sobrevivente violasaun direitu umanu iha pasadu nian.
Diretór Ezekutivu CNC,I.P, Hugo Maria Fernandes, hatete, ohin atividade selebra akordu entre CNC ho CHL, tanba CHL hanesan organizasaun internasionál ida ne’ebé sira nia fokus maka oinsá bele ajuda ema sira ne’ebé mak la iha kapasidade atu halo uma saudavel.
Diretór ne’e konta, depois de negosiasaun ohin CNC selebra akordu ho CHL, oinsá mak CHL bele harii uma ba sobrevivente sira, no bele tau matan ba ema sira ne’ebé mak kbiit ladún iha para bele hetan moris fatin ida ne’ebé mak saudavel.
“OJE ba tinan ida ne’e dolar amerikanu rihun 50 ba uma ne’ebé mak atu harii, maibé depende ba dezeñu no kapasidade orsamentu ne’ebé mak ami simu husi OJE ninian, nune’e hein katak semana ida ne’e ita sei finaliza,” Dehan Diretór Ezekutivu CNC Hugo hafoin asina akordu,iha Edifisiu CNC Balide, Segunda (10/07/2023).
Hugo akresenta, iha akordu ida ne’e CNC seidauk determina ba Munisípiu sira, tanba CNC tenke iha koordenasaun ho Asosiasaun Vitima ne’ebé mak sei solusiona sobrevivente sira ne’e, maibé loos duni atu halo uma tolu (3) ou uma haat (4) ho OJE iha tinan ida ne’e.
Hugo hatete, ida ne’e pasu ida mak importante tebes tanba durante ne’e CNC halo uma ba sobrevivente sira, maibé agora ho tan kooperasaun ida ne’e, hein katak padraun sira ne’ebé mak durante ne’e ba harii uma ida ne’ebé mak di’ak liu, saudavel no seguru ba sobrevivente sira.
“Ita halo akordu ne’e ba tinan ida, ne’ebé mak kooperasaun husi CNC ho CHL ba atividade ne’ebé mak ami harii hanesan Uma Memoria ba Esperansa liuliu ba sobrevivente sira husi violasaun direitu umanu iha pasadu nian,” Hugo informa.
Iha fatin hanesan, Country Manager CHL Timor-Leste no Papua New Guine, Jocelino Belmarco Alves, Agradese ba CNC ne’ebé mak apresia CHL atu halo dezeña ida ne’ebé tuir kritéria dezeña uma ne’ebé di’ak, depois ida ne’e mak importante liu tanba ida ne’e atu halo ba iha Munisípiu sira.
“Kooperasaun ida ne’e di’ak tebetebes hodi ita bele halo sistema uma ida ne’ebé ho saudavel, iha kondisaun ne’ebé mak di’ak, no mós iha dezeña hodi ita fó espasu, la’ós sai permanente hanesan ne’e, mais iha posibilidade ba aban bainrua dezeña sira ne’e bele aumenta tan uitoan karik família balu ruma atu aumenta kuartu ruma tan,” Country Manager CHL, Jocelino Belmarco Alves dehan.
Enkuantu tuir planu CNC nian ba tinan ida ne’e sei harii uma kain tolu ka haat tanba bazeia ba kontratu katak iha tinan ida nian, sira espera katak sei iha kontinuasaun hanesan programa nasionál ida ba iha nasaun ida ne’e
Jornalista : Mariano Do Santos Abi
Editór : Orlando Magno
