(Dili) Mudansa – Gobernu da sia liu husi Ministeriu Edukasaun no Sekretariu Estadu Ensinu Sekundariu Eskolar kontinua programa VIII governu nian kona-ba projetu komunitáriu hamutuk 202 maibé 100 resin faze inaugurasaun enkuantu 12 iha hela prosesu konstrusaun.
Sekretáriu Estadu Ensinu Sekundariu Eskolar Domingos Lopes Lemos informa, Ministra Edukasaun konvoka enkontru ho diresaun infraestrutura aprovizionamentu finansas kona-ba projetu governu sesante ne’ebé la’o hela husi tinan 2021-2023.
“Projetu komunitáriu 100 resin tama ba faze inaugurasaun maibé hela 12 mak iha hela prosesu konstrusaun, tanba durante ne’e udan la fó espasu atu mobiliza materiál hodi kontinua projetu ne’e.” Dehan Domingos Lopes ba jornalista iha nia knaar fatin Ministeriu Edukasaun Vila-Verde Dili, kinta, 20/07/23.
Governante ne’e esplika, Projetu ne’e balu iha área rurais estrada ladún di’ak entaun susar komunidade sira atu lori materiál ba iha terenu.
“Ita esforsu nafatin atu nune’e projetu hirak ne’e bele finaliza, no solusaun enkontru ho sira ne’e maneira saida mak uza hodi rezolve problema ne’ebé difikulta atividade refere,” Nia subliña.
Nia akresenta, Projetu ne’e ba eskola Ensinu Baziku, Ensinu Sekundariu iha kapitál dezenvolvimentu no mós Eskola Kafé Baucau nian no Projetu ne’e ba Munisípiu 13 ne’e hotu.
Nia parte, sei konvoka enkontru ho Ministra Edukasaun no mós diretór Kompaña kaer hela projetu ne’e se sira laiha ona kapasidade bele informa mai iha Ministeriu Edukasaun nune’e bele buka fali Kompaña seluk,
“Se Kompaña la bele ona atu kontinua ita mós labele obriga, disponibilidade ita buka fali Kompaña selu bazeia ba relatóriu tékniku nian iha terenu tanba sira hatene kle’an ba projetu ne’ebé la’o iha baze,” Nia hateten.
Sira nia informasaun mai iha Ministeriu ida ne’e mak loos la hapara, maibé fó ba Kompaña seluk hodi kontinua obra ne’e.
“Ita labele fó projetu ba kompañia ida to’o tiha klaran la iha kolaborasaun di’ak ho tékniku sira, tanba tékniku esplika ida kompañia halo ida sai fali seluk hodi hamosu dezentendimentu iha terenu,” nia hakotu.
Jornalista : Delfina Borges
Editór : Orlando Magno
