(Dili) Mudansa- Bazea ba dekretu lei Governu Nu. 33/2008 ne’ebé amplifika Ijene no Orden Públiku hahoris inisiativa no vontade puru Negosiante sira nian ne’ebé hamahan an iha Komunidade Negasiante Progresivu (KNP) orienta ba atividade limpeza jerál Sesta-Sesta iha Merkadu Taibesi hodi garante implementasaun lei ne’e ho susesu.
Komunidade Negosiante Progresivu (KNP) hamrik atu defende direitu negosiante sira nian no halo advokasia no desimina informasaun enrelasaun ho lei hirak ne’ebé aplika ba negosiante sira. Komunidade ne’e sei la haree de’it ba nogosiante sira iha Merikadu Taibesi maibé sira haree ba nogosiante hotu-hotu enjerál.
Armando da Silva nu’udar negosiante merkadu taibesi (faan plástiku) ne’ebé durante ne’e hamahan an iha Komunidade Negosiante Progresivu (KNP) hatete, objetivu prinsipál hosi inisiativa halo limpeza jerál kada sesta-sesta iha Merkadu Tasibesi ka terminal ne’e atu garante ambiente ka fatin merkadu ne’ebé moos no ijene ba ema (negosiante no kompradór sira) bainhira hala’o aktividade iha merkadu ne’e.
Razaun seluk ne’ebé dudu hodi hamosu inisiativa ne’e mak fatin ida ne’e fatin públiku, la’ós asesu de’it hosi negosiante sira iha Dili maibé mós maluk negosiante sira hosi munisípiu. Atu salva sira nia saúde, atu hadook sira hosi iss no dois, asegura ameansa ambientál, negosiante sira iha papél no obrigasaun atu halo limpreza ne’e dala ida kada semana.
Photo: Marcelino F. Soares
Iha prosesu aktividade limpeza, mosu mós dezafiu no difikuldade oi-oin mak hanesan, ignoransia ba aktividade interese komum, signifika, maske liña kordenasaun no komunnikasaun la’o di’ak entre nogosiante sira no entidade iha merkadu laran (seguransa, cleaner, no grupu movimentu sira iha merkadu), maibé bainhira aktividade limpeza ne’e la’o partisipasaun hosi nogosiante sira menus tebes.
Iha negosiante barak mak seidauk toma responsabilidade ba interese komum merkadu nian tanba ne’e, bainhira aktividade impeza ne’e la’o ignoransia nafatin akontese. Maibé emprinsipiu aktividade limpeza jerál ne’e orienta hosi inisiativa no vontade negosiante ida-idak nian la’ós obrikasaun. Tanba ne’e sei laiha represaun no obrigasaun entre negosiante sira ba atividade limpeza refere.
Difikuldade seluk ne’ebé ekipa ne’e hasoru mak fasilidade ka ekipamentu sira ne’ebé uza ba limpeza hanesan, ai-sar, garfu bo’ot, luvas, maskara, no seluk tan la iha tanba ne’e bainhira aktividade ne’e la’o bele prejudika ba saude nogosiante sira nian.
“Durante aktividade limpeza jerál ne’e la’o. Ekipa jestaun merkadu no cleaner sira nia partsipiasaun no kontribuisaun ba intesere komum, atividade limpeza jerál ne’e menus tebes. Fatus hatudu katak seguransa sira hateke ka haree hosi dook de’it, sira la mai ajuda, iha ida-rua mai ajuda maibé barak mak sei iha sentimentu ignoransia,” dehan Armando da Silva ba Jornalista Media Mudansa hafoin halo limpreza iha Mekadu Taibesi, Sesta, (07/07/2023).
“Bainhira sira haree hosi do’ok, dalaruma sira kolia agresivu (kasar) ba ami nia inan no feton sira, hanesan joven no negosiante, ami sente, laran moras maibe ami labele foti asaun hasoru sira tanba ami la iha poder,”.
Negosiante ne’e nota katak, ekipa jestaun merkadu, hahu hosi estrutura to’o mai iha membru sira, laiha fiar ba malu ka ladun iha liña kordenasaun ne’ebé di’ak. Fatus mak, tuir orariu orientasaun dehan kliner (cleaner) mai limpeza iha oras tuku 7 dadersan maibé pelu kontrariu sira balun mai dasa sedu liu iha oras tuku 5 dader no balun mai tuku 7 maibé sira dasa bou (foer hamutuk iha fatin ida) de’it, la ra’ut hodi lori ba lixu fatin.
Negosiante nee’e mós observa katak ekipa jestaun merkadu ka seguransa, durante atividade limpeza ne’e la’o sira nunka iha interese atu servisu hamtuk ho negosiante sira hodi hamoos. Sira só serbisu makaas liu bainhira iha orientasaun atu sobu nogosiante sira nia sasan.
“Iha limpreza ne’e ami haree katak kondutór la mai hamoos ho ami tanba banhira ami hamoos sira kontinua buka pasajeiru( penumpan),” informa nian
Ikus nia husu ba negosiante sira hotu, no mós hirak ne’ebé involve an iha grupu Komunidade Negosiante Progretivu (KNP) atu servisu hamtuk no hametin relasaun hodi sai forsa ida ba interese ida hodi luta ba embiente ne’ebé moos no ijene iha Merkadu Taibesi.
“Ba governu foun, da-sia karik atu troka autoridade jestaun merkadu foun, favór, loke espasu ba ami atu iha liña komunikasaun ne’ebé efetitu atu nune’e ami bele servisu hamutuk di’ak liu tan hodi hamorin fila fali naran merkadu nasionál, ohin no ba oin,” nia hakotu.
Jornalista : Felisberto Fernandes da Costa.
