PST Promete Hasa’e Salariu Funsionariu Publiku inklui PNTL-F-FDTL

banner 120x600

(Dili) Mudansa – Presidente Partidu Sosialista Timor(PST) Avelino Maria Coelho informa, preskomferensia ida ne’e espesialmente ba programa eleitorál ba funsionáriu públiku sira no mós ba Polisia Nasional Timor-Leste (PNTL) ho Forsa Defesa De Timor Leste (F-FDTL) oinsá atu hasa’e sira nia saláriu.

Nia afirma, Estadu Ida ne’e funsionáriu sira iha Komisaun Funsaun Publika labele partidarizadu husi Partidu Sira ne’ebé uluk kaer ukun tiha ona.

Funsaun Publika hare ba administrasaun estadu atu fó Servisu di’ak ba sidadaun Sira, liuliu ba instituisaun PNTL ne’ebé harii ho orgullu no estadu atu serví ámbitu seguransa no povu tomak.

F-FDTL harii husi transformasaun Falintil ba Forsa Defesa De Timor Leste iha instituisaun Tolu ne’e instituisaun ne’ebé  Timor oan barak Servisu iha ne’ebá, agrikultura nia oan, traballadór(a) nia oan servisu hotu iha ne’ebá.

Partidus hotu-hotu ko’alia inklui Partidu Sira ne’ebe agora tuur hela iha parlamentu nasionál durante Tinan lima (5) ko’alia atu hasa’e saláriu ba funsionáriu públiku no PNTL ho F-FDTL sira nian maibé kampaña dehan hasa’e saláriu manán tiha dehan labele tanba laiha vontade atu rezolve Problema funsionáriu sira nian.

“Ho Ida ne’e Partidu Sosialista Timor ohin dedika espesialmente tranzmisaun husi média nasionál sira ba eleitoradu ne’ebé nu’udar funsionáriu ho PNTL no F-FDTL sei ba vota iha 21 de maiu presiza hatene PST nia programa liuliu kona-ba hasa’e saláriu nian ne’e,” dehan Prezidente PST Avelino Coelho ba Jornalista iha Sede PST Balide Dili, 09/05/2023.

Avelino Coelho relata, Ba funsionáriu, Inan Aman no juventude sira, PST konsidera funsionáriu ne’e Klase média entaun tenke tau prioridade hodi hasa’e sira nia saláriu.

“Tanba Ita Nia rain funsionáriu barak mak terus, balun uma atu hela mós laiha, balun atu sa’e de’it mikrolét ba servisu mós kbiit la to’o, balun atu selu de’it nia oan nia eskola mós susar tebes, balun atu resposta nia moris mós arraska, tan barak hetan liu diskriminasaun,” nia realsa.

Nia dehan, PST la ko’alia saláriu ba traballadór(a) maibé ko’alia direitu ba asaun no iha fatin ne’ebé de’it sira servisu ba katak diferensiál ita ho partidu sira seluk, atu muda traballadór(a) nia vida entaun tenke ko’alia ho na’in indústria no sentru produsaun hotu-hotu ne’ebé traballadór servisu ba.

“ha’u la ko’alia Liu barreira, tanba  Ita-nia tarzetu la’ós liu barreira, maibé Ita-nia target atu manán eleisaun no la manán ne’e depende ba Ita hotu-hotu nia intervensaun, maibé papél média nia atu tranzmite partidus polítiku sira nia alternativus ba estadu no povu,” nia hakotu.

Estaziado: Zemidonio Martins

Editor      : Orlando Magno

banner 325x300