(Dili) Media Mudansa – Ema ho defisiénsia ne’ebé hamahon an iha grupu Ra’es Hadomi Timor Oan (RHTO-sigla portugés) nakonu ho hanoin kreatividade oioin espesiál ba atividade ofisina inkluzivu, kostura inkluzivu no resiklajen inkluzivu.
Asuntu ne’e hato’o husi Koordenadora organizasaun ba ema ho defisiénsia iha TL, ne’ebé harii grupu Ra’es Hadomi Timor Oan (RHTO-sigla portugés), Silvia Antonia da Costa Soares iha ninia knaar fatin Lahane Ocidental Dili, kinta 11/05/2023.
“Ofisina inkluzivu katak ami modifika motór sai ba roda tolu ba ema defisiénsia, kostura inkluzivu katak ami aprende suku ropa ba labarik ki’ik no boot, resiklajen inkluzivu katak ami transforma lixu husi doos/kaixa no surat tahan sai materiál reprodutivu no uzadu”, nia esplika
Nia haktuir, resiklajen primeiru hahú lees surat tahan hotu, hoban iha bee laran, durasaun loron ida depois hasai, ba blender fila fali surat tahan ne’e, prepara kedas bee no lem ai tau hamutuk iha basia ida.
Momentu ne’ebá RHTO seidauk hetan apoiu husi doadór sira, maibé sira hahú ho buat ne’ebé iha, liu tiha ida ne’e RHTOhetan suporta husi PHD tau osan ba ofisina modifika motór foun ba motór roda tolu.
“PHD hanoin tau ona osan ba motór roda tolu nian, sira komesa hola motór ida ami koko modifika ba motór roda tolu, nia rezultadu konsege di’ak entaun ami halo tan proposta ba doadór sira,” Silvia haktuir.
Nia konta, Tempu ne’e RHTO agradese ba empreza MIJEIRIO nian, tanba sira hatama proposta konsege hetan aprovasaun tanba empreza refere sente kontente bainhira haree proposta RHTO nia ne’ebé aprezenta mós atividade tolu.
“Bainhira ami hahú grupu tolu ne’e primeiru ami halo estudu komparativu ida iha Indonesia, entaun iha 2019 ami halo estudu komparativu ba ema ho defisiénsia nian, ikus mai ami sente kreativu iha atividade oioin”, nia tenik.
RHTO nia ezisténsia mai ho Inisiativa ida katak, tenke kria atividade negósiu oinsá atu sustenta fali organizasaun, tan ne’e sira fila husi estudu komparativu hahú koko halo atividade oioin, maibé primeiru rezultadu balun la du’un di’ak.
“Ita komesa hanoin ona, oinsá koko halo di’ak liu tan, no mós halo atividade la bele modelu ida de’it maibé tenke halo modelu tolu hanesan ohin ha’u dehan ona,” Koordenadora ne’e afirma.
Jornalista : Honorio Guteres
Editór : Orlando Magno
