(Dili) Mudansa – Membru Consehlo Administrasaun Centru Nasional Chega (CNC) Juvito Rego de Jesus Araujo husu ba Lider partidus polítiku Sira labele insulta malu Iha tempu kampaña maibé oinsá eduka povu sira.
“Ami lamenta tebetebes hahalok ne’ebé Partidu polítiku sira sa’e palku haluha an hodi ko’alia arbiru de’it, la aprezenta programa ida, molok atu ba halo Kampanha polítika ha’u hanoin halo ona faktu ida, ne’ebé la presiza atu insulta malu iha palku polítiku,” dehan Juvito ba Jornalista iha Salaun CNC Balide Dili, 10/05/2023.
Nia haktuir, iha CNE partidu polítiku hotu-hotu halo promesa atu labele uza violénsia verbál violénsia fízika, maibé halo tia promesa iha ne’ebá depois sai ba li’ur lider ParPol sira la kontrola nia ema.
“Ami husu ba lider polítiku sira liuliu ba sira ne’ebé responsavel másimu iha asaun polítika hotu-hotu atu kontrola sira nia ema, ne’ebé sa’e palku nune’e bele eduka povu iha polítika la’ós ba halo eskándalu iha palku nia leten, trata Lider istóriku sira, hasai liafuan bruseiru tolok, defamasaun ida ne’e la’ós polítika ne’ebé loos,” Juvito afirma.
Nia tenik, Iha palku Politika nia leten ne’e edukasaun Politika, edukasaun sívika ida ne’ebé Partidu polítiku sira hotu-hotu tenke tau iha neon katak, palku ida ne’e atu eduka povu ba polítika demokrasia maibé nakonu violénsia iha laran, ne’e tanba saida?
“Ita nunka hewai ba violénsia, tan la’ós Ita-nia Kultura ha’u hanoin Ita tenke eduka ona iha Kultura dame ninian, no Ita mai husi lider polítiku sira, tanba iha ne’ebá desizaun polítika ida mak halo kampaña polítika ne’e,” nia akresenta.
Nia katak,ema ne’ebé atu sa’e ba iha palku leten ne’ebá atu trata tuir polítika sira nia hakarak, maibé karik Parpol ida atu hasai hirus ba iha tribunál labele hasai iha palku polítiku, tanba Timor-Leste presiza kuda konsiénsia polítiku Ida ba pás rekonsiliasaun iha militante sira nia hanoin.
Se ema seluk halo karik violénsia iha ne’ebá ne’e ha’u hanoin katak iha instituisaun responsabilidade ba atitude hirak ne’e tenke sama atensaun.
“Infelismente CNC nia lei ne’e fraku demais ha’u hanoin presiza reforsa CNE ninia papél iha kampaña polítika nune’e CNC bele halo repetisaun direita ou bele haruka para kampaña ne’ebé la edukativu tan ne’e CNC ho preokupasaun hirak to’o agora halo atu harii dame, atu Ita labele repete violénsia hirak ne’e,” nia deklara.
Juvito realsa, violénsia hirak ne’e la’o nafatin entaun kompromisu ba Ida ne’e laiha, no la iha orgullu ba polítiku sira, sosiedade, no povu sira.
Estajiadu : Zemidonio Martins
Editór : Orlando Magno
