(Dili) Mudansa – Sua Eminênsia Dom Virgilio Cardeal Do Carmo da Silva.SDB informa, kada tinan sarani sira selebra festa páskua hodi hanoin hikas jesus nia terus no mate entaun ida la’ós hanesan eventu ne’ebé baibain.
“Selebrasaun Paskua la’ós Festa baibain la’ós eventu ida ne’ebé baibain maibé bainhira ita ko’alia kona ba páskua ita ko’alia kona ba pesoa ida mak ita na’in Jesus kristu rasik,”dehan Dom Virgilio Cardeal ba Jornalista hafoin remata misa iha katedrál Dili, Sabadu kalan, 08/04/2023.
Nia afirma, Paskua hanoin kona ba na’in jesu Kristu nia terus no mate no moris hi’as entaun ema ne’ebé durante ne’e prepara páskua lori mai hasoru malu ho kristu no atu hasoru malu ho naroman ne’ebé ohin loke iha loron páskua ida ne’e atu tulun sarani sira besik liu tan ba maromak.
“Naroman ne’e tenke lori ita atu sente katak ita ne’e mai husi naroman tanba naroman lori ita atu rekoñese nu’udar maromak nia oan no lori ita atu hatene ita-nia nakukun sira mak ita bele la’o iha dalan ne’ebé loos,” Primeiru Cardeal Timor-Leste relata.
Nia akresenta, hein katak páskua sai momentu ida bele hafoun sarani nia hanoin hodi moris nu’udar maromak oan ne’ebé loos.
“Aproveita biban hafoin termina misa ha’u hakarak hato’o ha’u-nia boas festa páskua nian ba sarani hotu iha rai doben Timor-Leste ne’ebé selebra páskua,” nia hakotu.
Jornalista : Ekipa Media Mudansa
Editór : Orlando Magno
