(Dili) Mudansa – Komandante Munidipiu Dili Superintendente Xefe Natercia E. S Martins husu Ba sidadaun hotu, mezmu satiadu hela asuntu ka interese ruma, bainhira deside atu halo krime ka halo ona krime ruma, tau iha ulun malirin katak imi sei simu konsekuénsia legál.
“Konsekuénsia ne’ebé sei mosu ba imi-nia an, Sorte di’ak, imi sei moris naruk, maibé sei simu konsekuénsia legál hodi husu imi-nia responsabilidade tuir lei penál haruka, hodi lori imi ba hatán iha sela polísia, prokuradoria no tribunál tanba imi-nia aktu kriminál sira, maibé dala ruma iha situasaun balun imi sei hasoru risku ba imi-nia integridade fízika no tenke lori imi halai ba tratamentu iha ospitál,” dehan Komanadante Munidipiu Dili Natercia iha nia facebook ofisiál (Natercia Martins) sesta 07/04/2023.
Aleinde ne’e, Sei aplika lei hodi limite imi-nia direitu no liberdade no ikus liu sei lori imi ba hela hakmatek iha prizaun ka kadeia, fatin ne’ebé limite tebes imi-nia direitu ba sirkulasaun/movimentu hodi halibur hamutuk ho ema sira ne’ebé imi hadomi.
Bainhira autoridade seguransa la to’o lalais hodi asegura imi-nia direitu ba moris, ema ruma liman lais tanba hanoin vítima, bele fó konsekuénsia hanesan ba imi no bele mate ka kanek.
“Sorte aat liu mak bainhira ema liman Laís liu ba imi ho sasán kro’at ruma kona imi-nia mate fatin, pasiénsia imi muda imi-nia hela fatin hodi ba hela iha fatin foun, ne’ebé baibain ema dehan ba Aldeia la fila. Fatin ne’ebé sei fahe imi-nia hakarak totalmente ho imi-nia família,” nia esplika.
Tanba ne’e, maun-alin sira, tau didi’ak iha imi-nia neon no hanoin, mezmu satiadu ba asuntu ruma, ko’alia di’ak ba malu, se lae buka autoridade seguransa hodi rezolve. Labele rezolve problema, ho dalan halo fali tan problema ne’ebé hamosu akto kriminál.
Ne’e duni, tenke hatene an katak iha konflitu ne’ebé rezulta krime, sei la lori benefísiu Diak ba imi, maibé sei halo kloot imi-nia liberdade hodi goza ukun rasik -an ne’e, no garante ema hotu atu goza sira nia direitu ho livre. La’ós imi fó an atu hetan kanek, mate tan de’it interese grupu ne’ebé sei la responsabiliza imi-nia an no imi-nia família sira.
Piór liu, iha períodu eleisaun parlamentár tinan 2023 ne’e, di’ak liu lalika halo krime, disiplina ba rona polítika sira aprezenta sira nia programa iha kampaña, se konvense imi, vota ba sira, se lae vota tuir imi-nia konsiénsia.
“Iha polítika, polítiku sira halo polítika para hetan podér, simplesmente hadau malu kadeira, kriminozu sira hadau malu mak ospitál, kadeia no kaixaun hodi ba aldeia la fila,” nia akresenta.
Nia garantia, durante períodu eleisaun parlamentár iha kampaña, to’o loron votasaun 21.05.2023 no apuramentu sira iha sentru votasaun iha munisípiu ka nasionál, liuliu iha munisípiu Dili, ema hotu-hotu, liuliu Jovens militantes no simpatizantes partidu konkorrente sira, sei disiplina no la halo aktu kriminál.
“Mai ita hakribi aktu kriminál hodi selebra festa demokrasia ho Diak,” nia hakotu.
Jornalista : Ekipa MD
Editór : Orlando Magno
