(Dili) Mudansa – Loro-matan hatudu an iha Dadersaan signifika fo hanoin ba idozu atu foti saku mamuk kaer iha liman hodi la’o buka lata mamuk iha fatin fatin oinsá bele hetan osan uitoan iha loron ida nune’e bele sosa buat ruma hodi moris naruk.
Maske idade avansadu maibé la sai sasukat atu la’o hale’u sidade Dili hodi buka no halibur lata (Bir) mamuk nune’e bele hetan osan uitoan bainhira fa’an fali hodi hatán ba nesesidade loroloron tanba ema ida-idak sempre sai responsavel ba nia moris la’ós garantia ba ema seluk hoi moris.
Hakarak tebes atu tuur hakmatek de’it iha uma tanba idade mós aumenta ba beibeik forsa hahú menus ba dadaun maibé realidade hatudu la hanesan ho hakarak ne’ebé ema ida-idak sente entaun tenke esforsu an tuir realidade ne’ebé mosu.
Situasaun ne’e hatudu momoos ba idozu Andre Luis de Deus ho idade 76, orijen husi munisípiu Ainaru postu administrativu Maubesi Suku Aitutu Aldeia Naihou daudaun ne’e nia hela ho nia kaben iha Aldeia Samatana Suku Bairu – Pite Postu Administrativu Don Alexo Munisipiu Dili.
Idozu Andre informa, nia laiha família tanba tempu okupasaun família sira mate hotu iha ai-laran entaun la iha ema ida atu tau matan ba sira nia moris tanba ne’e Avo Andre tenke esforsu an hodi buka osan oinsá bele han iha tempu loron no kalan ida.
“Ha’u halibur Lata mamuk hodi fa’an oinsá bele hetan osan hodi sosa foos no mina nune’e bele kalsu kabun hodi hatutan moris naruk, maski idade avansadu ona hanesan ne’e mak ita la esforsu an se loos mak atu tau matan ba ida serake ha’u-nia família mate hotu ona,” dehan Andre ba média Mudansa iha jardin 5 de Maiu Dili, tersa 10/04/2023.
Moris tenke nakonu ho pasiénsia hodi esforsu an atu moris loron naruk maski Moris ne’e simples nafatin agradese ba Maromak, Tamba sei bele moris iha tinan naruk nia laran.
Maromak fó ona alin liman kompletu ba ema atu esforsu an hodi hetan dolar maski la’o to’o dolar maibé ida ne’e mak realidade ba ema ida-idak nia moris.
“Hau nia servisu loroloron buka no halibur lata, tetu fila fali iha gerobak sira ne’ebé ba mai iha Dili laran, kilu Ida sentavu 50, Se Ita halibur lata mamuk to’o saku Rua ka tolu entaun ita bele hetan osan to’o dolar rua ba leten, maibé kada loron ha’u hetan de’it $.1.00 lae $.2.00,” nia deklara.
Idozu Andre hetan subsídiu terseira Idade kada fulan neen $.300.00 Husi Governu Fulan maibé osan ne’ebé nia hetan la sufisiente atu responde ba nesesidade uma laran.
Estajiadu : Zemidonio Martins
Editór : Orlando Magno
