(Dili) Mudansa – Instituisaun Edukativa Cristal – Fundasaun Cristal (IEC-FC), halo asaun karidade hodi selebra festa páskua atu hametin fiar ba maromak no haburas domin ba ema hotu liuliu ba hirak ne’ebé presiza tulun.
Prezidente Ezekutivu Fundasaun Cristal Agostinho dos Santos Gonçalves informa, IEC – FC halo asaun Kariedade ba komunidade sira ne’ebé hamahon an iha sentru Kongregasaun Komunidade Cristu Betania Kulau (CCBC-sigla portuges), ne’ebé lokaliza iha aldeia Kulau, suku Ai-lok, Parokia Bee Dois Bekora.
“Ami halo asaun kualitativa ka Kariedade kada tinan iha tempu Paskua no natál ami sempre halo hodi apoiu nesesidade bázika ba fatin sira ne’ebé presiza ita-nia tulun, buat ne’ebé ita iha tenke fahe ho laran ba maluk sira ne’ebé presiza tulun hodi haburas domin nafatin fiar metin ba maromak,” dehan Prezidente EFC Agustino ba Jornalista iha Becora Kinta Dili, kinta 06/04/2023.
Nia afirma, tenke fahe domin ba malu liuliu iha tempu páskua ne’ebé hanesan agora IEC-FC halo, ne’e merese presiza atu ajuda sira.
“Ita haree iha Kinta-Feira santa, Jesus hanorin ba ita katak, Jesus halibur apóstolu sira hodi hamutuk halo Sakramentu Eukaristia signifika fahe Domin ba apóstolu sira no hanorin ita atu fahe domin ba maluk viziñu sira ne’ebé presiza tulun, ne’ebé ita labele arrogánsia, no egoízmu, hanoin ba ita-nia an de’it maibé hanoin mós ho sira seluk,” Prezidente EFC esplika.
Iha fatin hanesan, Responsavel Kongregasaun CCBC, Madre Alcinda Oliveira hato’o sentimentu agradese ba fundadores Fundasaun Cristal ho ekipa tomak ne’ebé fó ona apoiu nesesidade Bazika ba sira.
Nia relata, Prezidente EFC ho estrutura tomak mai iha ne’e hala’o duni konkretu, tanba Kristu husik mai ba ema la’ós atu mate, maibé nu’udar Kristu nia liman ain, Kontinua Domin no Kariedade ba maluk sira ne’ebé presiza tulun no fó ho fuan nune’e sira simu mós sente ho domin Kristu ninian.
“Ha’u agradese ba asaun karitativa husi IEC-FC tanba ajuda ida konkretu ne’ebé Kristu dehan buat hotu sei pasa maibé Kariedade la pasa, ida ne’e konkretu ne’ebé mai kedas iha fatin ida ne’e mezmu simples maibé nakonu ho Domin tan ne’e, ami sei hatutan ba hirak ne’ebé presiza Domin,” nia akresenta.
Madre ne’e salienta, asaun Kariedade ne’e mezmu simples maibé nakonu ho Domin, tanba agora tempu kuarezma nian, tama ona semana santa, mezmu hanesan ne’e, maibé Jesus husik mai mundu ne’e katak, halo Orasaun, Penitensia no Kariedade.
Entretantu Asaun karidade ne’e partisipa husi Prezidente Ezekutivu Fundasaun Cristal, Reitor ISC ho nia estrutura, Diretor ESGP Cristal, Diretor EB Terseiru Siklu Cristal, Funsionasiu IEC-FC no mós Senadu Fakuldade Siensia Edukasaun inklui estudante ISC.
Jornalista : Ekipa MediaMudansa
Editór : Orlando Magno
