(Dili) Mudansa – Partidu Congresso Nacionál de Reconstrução de Timor (CNRT), Ohin loron segunda (17/04/2023), oferese transporte hanesan viatura no motorizada inklui atributu partidu nian ba koordenadór partidu CNRT husi munisípiu inklui postu administrativu hamutuk 66 atu bele utiliza ba atividade partidu nian durante iha kampaña Eleisaun Parlamentar.
Ba atribuisaun hirak ne’ebé partidu CNRT oferese, nu’udar inisiativa ida atu fasilita koordenadór sira oinsá bele servisu di’ak liután, hodi fó vitória ba Partidu CNRT iha eleisaun parlamentár 2023.
Durante iha atividade oferese transporte , Prezidente Partidu CNRT Kay Rala Xanana Gusmão hatete, distribuisaun ida-ne’e hanesan simbolikamente de’it, ne’ebé partidu halo hodi fó uluk ba koordenadór sira husi Munisipiu Manatutu, Vikeke, Baukau no Lautém, tanba munisípiu hirak ne’e mak sei halo kampaña uluk.
“Agora ne’e simbolikamente tanba hahú husi Manatutu, ba Vikeke Baukau Lautém, ne’e mak sira simu uluk tiha lai, depois haree fali sira seluk,”dehan Xanana hafoin halo distribuisaun ekipamentu ba Koordenador sira iha Sede Partidu CNRT Bairro dos Grilhos, segunda 17/04/2023.
Fatin hanesan, Koordenadór Partidu CNRT Munisípiu Lautém, Albino da Silva hatete nia parte agradese tebes tanba partidu CNRT bele fasilita ona transporte ba sira.
“Ami agradese ba partidu no ami iha responsabilidade ba sasán ne’ebé ohin simu, nia objetivu mak, oinsá ami bele servisu no koopera hamutuk, hodi bele fó susesu ba eleisaun parlamentár ne’ebé mai daudauk, Ami iha postu administrativu 5 mak foin hetan motorizada, no munisípiu hetan karreta ida,” Albino konta.
Nia haktuir, iha munisípiu Lautém rasik mós dadaun ne’e preparadu ona, atu la’o tuir kalendáriu ne’ebé STAE no CNE fó sai, tanba ne’e, ohin simu ona transporte partidu nian depois sei fila ba baze atu servisu, ko’alia kona-ba votu, Nia fiar munisípiu Lautém sei fó votu maioria ba Partidu CNRT.
Aleinde ne’e, Koordenador Partidu CNRT Munisípiu Manatutu Marcos dos Reis Cuinha argumenta, Koordenador Munisipiu Manatutu simu ona karreta ida, maibé ba fali koordenadór postu administrativu ne’e simu motorizada hamutuk 25.
“Ida ne’e atu halo movimentu apartir aban bainrua to’o eleisaun remata, depois motór ne’e kuandu to’o eleisaun hotu mos hela ba sira, la’os prezidente partidu atu dada fali,” nia esplika.
Mezmu hetan fasilidade transporte husi partidu maibé nu’udar koordenadór partidu CNRT nian, sei la promete dehan Manatutu atu manán maioria, tanba ida ne’e só maromak mak bele hatene, inklui povu maka sei deside.
Jornalista : Julião da Silva
Editór : Orlando Magno
