(Bobonaru) Mudansa – Prezidénsia Repúblika, José Ramos-Horta, liu husi Gabinete Servisu Sosisedade Sivíl no Assuntu Sosiál (SSAS), distribui nesesidade bázika ba vítima dezastre naturais iha Suku Soilesu no Ilat-Lau, Munisípiu Bobonaro.
Iha ne’ebé, Dezastre naturál ne’e akontese iha loron 3 fulan Marsu tinan 2023, estraga rezidénsia husi uma-kain 18 iha Aldeia Soilesu no Ai-Aras, Suku Soilesu no uma-kain 6 ne’ebé pertense ba Aldeia Ilat-Laun, Postu Administrativu Bobonaro.
“Kontente tanba ita hotu nia kontribuisaun ita bele ajudu ita-nia maluk sira hetan dezastre naturais, Sasan oituan ne’ebé mai husi Prezidente Repúblika Horta, ne’e ita hotu nia ajudu,” Dehan Assesór ba Gabinete SSAS-Prezidénsia Repúblika Quintiliano Moníz Amaral ba Jornalista iha Bobonaru, Sabadu 11/03/2023.
Quintiliano informa, Xefe Estadu hakarak halo intervensaun lalais ba sidadaun sira ne’ebá afetadu husi dezastre naturais ruma no sempre orienta ekipa, hodi halo verifikasaun no mobiliza apoiu, hodi hakmaan sidadaun ne’ebé hetan susar.
Iha sorin seluk Xefe Suku Soilesu, Norberto Martins Simão, agradese ba Prezidente Repúblika nia apoiu ba vítima dezastre naturais.
“Vitima sira susar tebes ba hela fatin no ai-han, tanba hafoin akontesimentu ida-ne’e mosu, Norberto relata kedas ba autoridade munisipál, maibé la iha resposta emerjénsia to’o agora,” Norberto relata.
Tuir observasaun, rai-halai hodi taka uma balun no estraga totál vítima sira nia uma hodi la salva sira nia sasán uma-laran inklui animál no plantasaun sira iha suku ne’e maibé to’o agora governu seidauk halo intervensaun ba vítima dezastre sira nia problema ne’ebé sira hasoru.
Jornalista : Ekipa MD
Editor : Orlando Magno