(Díli) Media Mudansa – Mina tradisionál Aloe Vera Oil bele kura moras oioin ne’ebé prodús husi empreza aldiamond shine uza produtu lokál hanesan lidah buaya no mina nuu,
Diretóra Empreza Aldiamond Shine, Aquina Cardoso informa, nia parte iha inisiativa hakarak prodús mina tradisionál Aloe Vera Oil bainhira nia oan feto fuuk monu hotu la iha ai-moruk ida mak bele kura, ho ida ne’e Aquina halo peskiza iha internét hodi prodús mina tradisionál Aloe Vera Oil ne’ebé bele kura moras oioin.
“Primeira vés ha’u nia oan feto adai monmentu ne’e nia fuuk botak entaun ha’u hanoin katak ha’u halo saida mak nia fuuk bele iha fali, ema barak fó ai-moruk maibé nunka di’ak, ha’u halo aloe vera oil ne’e tau ba nia fuuk durante fulan ida deit nia fuuk bele moris fali,” dehan Aquina ba jornalista média mudansa iha Comoro Dili, Domingu 12/03/2023.
Nia haktuir, úniku empreza Aldiamond Shine mak prodús uluk mina tradisionál Aloe Vera Oil iha Timor- Leste atu fó salvasaun, hakmaan no halakon ema nia tristeza ba moras iha isin lolon no laran.
“Benefísiu aloe vera oil bele halakon no kura moras oioin iha ita nia isin lolon hanesan, halakon isin kole, isin manas ba ema boot no labarik, kostupadu, ulun moras, kanek foun no tuan, kanek infesaun katar, kaskadu, iha parte vital, sélula husi isin kulit mate, kaspa, jerawat, flek metan, maskra oin no nutrisaun di’ak hodi hamoris fuuk,” nia deklara.
Aquina afirma, Empreza ho naran Aldiamond Shine ida ne’e mosu husi nia oan feto ne’ebé sei ki’ik fuuk la iha tanba fuuk monu hotu, maibé daudaun ne’e nia oan refere fuuk iha fali ona maske seidauk naruk.
Emprezaria nee argumenta, mina ne’e bele kose ba moras barak tanba durante nee ema barak mak uza mina tradisionál Aleo Vera Oil hodi kura moras iha isin lolos no moras laran ikus mai moras sira rekupera hotu.
“Buat ne’e hanesan milagre ida ba ami tanba dala barak ona ami koko ba kanek, koko ba buat barak di’ak hotu, entaun ita bele halo produsaun ida atu halo negósiu hodi ajuda maluk sira seluk neebe hetan moras oioin, mina nee ami faan botir kiik ida ho presu $.10.00 ,” Nia haktuir.
Feto Bonita ne’e konta, husi inísiu, momentu ne’ebá nia sente triste tanba halibur mina nuu primeiru fakar hotu tiha entaun nia konvida ema balu hodi tau hanoin hamutuk atu prodús fila fali mina tradisionál ne’e.
“Mehi mak sai ita-nia BIG BOSS no hetan motivasaun husi Sr. Mark Hughes mak sai ha’u nia inspirasaun ba no sempre hateten ita-nia mehi mak sai ita-nia big bos la’ós ema ne’ebé ita servisu ba nia mak sai bos maibé mehi mak bos” nia deklara.
Nia afirma, istória husi Mark Hughes hanesan mós matadalan ba empreza Aldiamond Shine iha timor-leste ne’ebé daudaun nia halo tuir sai realidade no benefísiu ba Aquina ho nia ekipa inklui ba ema hirak ne’ebé uza ona Mina tradisionál Mina Aloe Vera Oil.
“Ha’u nia mehi obriga ha’u buka tuir referénsia iha livru, internét no youtube ikus mai konsege hetan no iha rezultadu pozitivu ba ha’u nia moris tomak, ha’u nia mehi mós atu loke loja boot ka laboratóriu ida ba estudante sira atu mai aprende,” nia akresenta.
Lautem oan ne’e argumenta, Uluk nia tuur iha kadeira nivel sekundáriu iha mehi ida atu prodús sabaun maibé ekipamentu atu prodús sabaun iha timor la iha entaun Aquina nafatin esforsu an sei loke tan loja kímika ida ba estudante sira iha timor.
“Hau prodús mina aloe vera oil ajuda mós estudante sira ne’ebé hela hamutuk ho ha’u atu fa’an nune’e sira bele hetan benefísiu oituan husi Mina Tradisioanal Aloe Vera Oil,” Fundadora Aldiamond Shine Aquina realsa.
Diretóra Aldiamond Shine Aquina Cardoso prodús mina tradisionál aloe vera oil husi materiál prima hanesan virgin coconut oil (Mina nuu Virjen), aloe vera no Cananga Odorata.
Jornalista : Honório Guterres
Editór : Orlando Magno
