(Dili) Mudansa – Durante ne’e Guarda Munisipal Dili esforsu an hodi hapara negosiante sira ne’ebé fa’an iha Terminal ka Parkiran merkadu Taibesi ohin loron sira susesu tanba negosiante sira hamamuk ona fatin ba Transporte.
Xefe Departamentu Guarda Munisipiu Dili Gaspar da Silva informa, sira nafatin halo kontrolu ba vendedór sira ne’ebé fa’an sasán iha Terminal merkadu Taibesi tanba negosiante balu fa’an la tuir nia fatin.
“Hau haree agora fatin ne’ebé durante ne’e vendedór sira okupa komesa mamuk ona Tamba kontrola makas husi Guarda munisipál sira” dehan Gaspar ba Media Mudansa iha nia knaar fatin Taibesi Dili, kuarta 8/03/2023.
Gaspar haktuir, ohin loron vendedór(a) sira la fa’an ona iha Terminal merkadu Taibesi maibé Guarda munisípiu nafatin kontrola atu vendedór sira labele fa’an tan iha fatin ne’e hodi okupa fali fatin ba transporte.
Nia haktuir, Merkadu munisipál ne’ebé governu harii iha Taibesi no Merkadu Manleu, inklui mini merkadu sira hanesan Iha terminál Becora atu nune’e Bendedor sira labele okupa Fali dalan públiku sira.
“Se Bendedor sira fa’an sasán la tuir dalan mak ami sei la’o tuir lei artigu 6 aliña 3 hatete, (bainhira hala’o negosia labele iha estrada públiku) tan ne’e Departamentu hamriik atu kumpre de’it lei ne’ebé eziste ona no sei la tolera Bendedor ne’ebé mak fa’an Sasan iha Fatin Publiku Tamba governu prepara ona Merkadu,” nia deklara
Nune’e mós Xefe Departamentu Guarda Munisipiu Dili Gaspar da Silva hato’o ninia mensajen ba vendedór sira nune’e, Dili mak Sidade ba Timor tanba ne’e hala’o negósiu karik Lao tuir nia Orden labele fa’an fali iha fatin públiku hodi hamosu engarrafamentu no Atrapalha mós Movimentasaun transporte.
Estajiada : Isabel de Fatima/Remigia Locateli
Editór : Orlando Magno
