(Dili) Mudansa – La’o ba mai la sente kolen la sente baruk husik loro-matan ho udan mak sai sasin ba esforsu hira ne’e, la’o iha loro-matan nia roman manas hanas kulit atu motuk maibé sente hanesan baibain maski la’o iha udan laran maibé la sente mós malirin tanba hakarak responde nesesidade uma laran.
Ema ida-idak nia Esforsu an ba moris loroloron diferensiá tebes tanba balu esforsu an liu husi servisu kantór ka gravatadu dependénsia ba osan fulan (saláriu), balu moris dependénsia de’it ba negósiu tanba dalan moris atu moris naruk mak nune’e.
Inan faluk ida ho idade avansadu ne’ebé esforsu an halo negósiu la’o la sura kolen no terus iha lalehan nia okos no mós iha rai nia leten tan buat hotu maromak nia planu entaun ema moris hein la’o tuir de’it saida mak maromak hatuur ona.
La espera situasaun ida ne’e atu akontese ba Inan faluk Marcelina da Costa ho tinan (66) orijen husi Aileu daudaun ne’e hela iha Hera, ninia moris loroloron depende de’it ba negósiu fa’an tutur no leba lori la’o hale’u sidade Dili, eh tanba sá inan faluk ho idade avansadu ona maibé hakarak nafatin fa’an sasán la’o lemo-lemo? Buat hirak ne’e hotu tanba de’it nesesidade uma laran no mós prepara ba Beioan sira nia futuru.
Inan faluk Marcelina da Costa konta, vida moris atu moris naruk ne’e la fasil, Hakarak atu hadi’a moris labele lakon vontade atu la’o iha situasaun saida de’it, maibé tenke prontu hasoru dezafiu maski la’o dook iha loron manas no udan laran maibé ida ne’e hanesan sasidik moris nia entaun kontinua la’o ba oin.
“Hau Fa’an bote atu sustenta ba moris loroloron no sosa bei-oan sira nia atributu eskola ho razaun ida ne’e maka, ha’u tenke esforsu an buka osan maski loro-manas no udan ha’u nafatin hakat husik udan ho loron mak hatene ha’u-nia esforsu ne’e ha’u rasik la bele konta,” dehan Marcelina da Costa ba jornalista média mudansa iha Taibesi sesta feira 04/02/2023.
Inan Faluk Marcelina ho nia fuan domin (kaben) Sebastião da Silva (matebian) iha oan na’in lima entre na’in lima ne’e forma hotu ona família. Tanba ne’e obrigatóriu inan faluk tenke buka dalan moris nune’e bele moris naruk.
Inan faluk bonita ne’e, hi’it ain hakat sai husi nia rezidénsia ne’ebé lokaliza iha Hera mai fa’an iha Merkadu Taibesi, iha ne’ebé nia fa’an bote ida ho presu, $.3.50, hufffff… afinál feto faluk ne’e la’ós fa’an de’it iha merkadu Taibesi maibé nia leba no hulan bote ne’e lori la’o fa’an tamas sai bairru husi merkadu Taibesi ba tasi tolu.
“Atu halo negósiu labele Hare’e ba Idade, tanba ema ida-idak responsavel ba ninia moris, se ita la book an se loos mak atu fó osan ba ita nune’e mós kalan ho loron atu han saida karik ita rasik la esforsu an, tanba ne’e, tenke esforsu an hodi halo netik buat ruma ba ita-nia an,” feto bonita ne’e akresenta
Aileu oan ne’e informa ba jornalista Media Mudansa nune’e, kada loron rendimentu husi bote ne’e ki’ik loos halo nia laran taridu no triste maibé feto bonita ne’e ho oin midar kontinua la’o hodi fa’an nafatin tanba loron ohin la hanesan ho loron aban, no mós sorte ne’e mai la’ós ohin no aban maibé loron ida.
“Bainhira ema ladún sosa bote ne’e ha’u hanoin barak, maibé triste liu mak bainhira ema la sosa liu tanba fila ba uma ho liman mamuk de’it , maibé ha’u nafatin pasiénsia de’it, maski ohin loron ha’u la hetan osan Maibe loron seluk sei hetan,” nia akresenta
Esforsu an hikis rasik kosar been ne’e la buat ida maibé na’ok fali ema seluk nia sasán mak labele, bainhira ema ida uza rasik ninia kosar been fa’an neineik maski na’ok maibé bele responde nesesidade uma laran.
Jornalista : Domingas Viana
Editór : Orlando Magno
