Ema Balun “Moe La Iha” Nafatin So’e Fo’er Arbiru

banner 120x600

(Dili) Mundansa – Baleta iha estádiun Nasinal nia oin sai fatin lixu ba ema neon-laek moe la iha sira hodi soe lixu iha baleta laran maibé la hatene katak fo’er ne’ebé sira soe arbiru ne’e impaktu ba ema barak nia vida.

Estudante Universidade Dili (UNDIL) Fakuldade Saude Departamentu Enfermazen Paquito Prego De Andrade informa, hanesan sidadaun Timor oan Ida, bainhira hare lixu barak iha baleta laran hanesan ne’e ladún di’ak tanba bele prejudika ou Impaktu boot ba nia saúde no estraga ambiente sidade nian.

“Lixu barak hanesan ne’e, bainhira udan boot bele hamosu erozaun ba Ita, no bee iha baleta laran la’o la normál tanba ita-nia maluk balu to’o agora seidauk koñese lixu fatin no la iha konsiénsia hodi soe fo’er arbiru,” dehan Paquito ba Media Mudansa iha Kaikoli Dili, segunda 20/02/2023.

Prego afirma, Soe fo’er la tuir nia fatin, depois udan boot ou mosu akontesimentu natureza, atu fó sala ba se? tanba ne’e ema ida ida tenke tau konsiénsia hodi tau lixu iha nia fatin nune’e ekipa ra’ut lixu bele tula ba karreta hodi ba soe iha lixu fatin Tibar.

“Hau hanoin Fatin Sira hanesan ne’e Ita mós presiza tau importánsia, se Lae bele hamosu impaktu ou hamosu inundasaun iha Estadion  ne’e,” nia akresenta.

Prego sujere, ba parte relevante entre ligadu meiu-ambiente atu fahe koñesimentu liu husi sosializasaun, liuliu ba alin ki’ik oan sira, nune’e bele kontrola sira nia an tanba maioria husi ki’ik oan sira mak soe fo’er laiha koñesimentu ne’ebé kle’an, no la hatene saida mak impaktu husi fo’er.

“Foer ne’ebé Soe ne’e Nia influénsia ou Nia efeitu negativu Mai Husi alin Sira ne’ebé ho tinan 5 ba leten, tan ne’e parte relevante presiza fó formasaun públiku liuliu ba joven no labarik ki’ik sira nune’e bele soe fo’er iha nia fatin la’ós soe fo’er arbiru,” nia salienta.

Joven mane ne’e relata, iha Fatin públiku ne’ebé konsentra ema barak maioria iha ona lixu fatin, maibé sidadaun balu laiha konsiénsia ou koñesimentu kle’an atu Soe fo’er tuir Nia Fatin.

“Ita labele fó sala ba parte relevante sira, ita tenke rekoñese ita-nia sala, tanba parte relevante sira prepara tiha ona lixu fatin ba ita, maibé ita mak la soe tuir nia fatin ne’ebé sira prepara ona,” nia hatete.

Nune’e mós prego hato’o ninia rekomendasaun ba públiku liuliu ba joven sira katak, tempu to’o ona atu halo kontribui ba rai no nasaun ida ne’e, tanba ne’e presiza kuida ambiente atu labele fó impaktu ba saúde no labele fó ameasa ba ema vida loroloron.

Estajiadu : Zemidonio Martins

Editór       : Orlando Magno

banner 325x300