(Dili) Mudansa – Negosiante Olívia Serão sente kontente bainhira partisipa iha feira ne’ebé realiza husi Ministeriu Turismos Komersiu Indústria (MTCI), tanba iha biban ne’e ema estranjeiru mós bele haree no sosa Olivia nia produtu ne’ebé nia fa’an iha feira ne’e.
“Ha’u sente kontente loos tanba la’ós Timoroan de’it mak sosa ami nia produtu ne’e maibé ema estranjeiru mós barak mak hakat mai hodi sosa produtu sira ne’ebé ami fa’an iha ne’e maibé atu dehan de’it katak maioria Timoroan mak sosa,” dehan Olivia ba média Mudansa iha areadores palásiu Governu Dili, Kinta 19/01/2023.
Olivia haktuir, rendimentu kapás tebes tanba fatin ne’ebé agora nia fa’an iha kedas estrada ibun ema barak mak halo Movimentu ba mai husi dadeer to’o kalan.
“Ha’u fa’an hahú husi dia 20 dezembru 2022 to’o agora ami hetan ona rendimentu ho osan montante 500.00 resin ha’u kontente tebes tanba fatin ida ne’e fatin kapas maibé, uluk iha CCD ne’e ladún di’ak tanba iha laran entaun menus kompradór,” Nia esplika.
Nia dehan, antes sira atu partisipa programa feira nasionál iha munisípiu (13) inklui mós iha nasaun seluk , tenke tuir treinamentu kona-ba produtu artezanatu durante semana tolu ba leten depois mak sira lori fali produtu hirak ne’e hodi ba promove fila fali iha fatin fatin.
“Ami tuir treinamentu homan,no suku pasta ne’e durante semana tolu, depois ami ba fó treinamentu fali ba ema seluk kona ba oinsá suku pasta kombina tais, homan batar kulit halo ba ai-funan,no oinsá ita homan akadiru tahan sai fali ai-funan,”katak nia
Negosiante ne’e mós hato’o ninia sentimentu agradese ba parte governu liuliu ba MTCI tanba bele fó ona espasu hodi konvida grupu Artezanatos Lisatelu husi munisípiu Likisa bele partisipa feira nasionál hodi promove artezenatu iha rai laran inklui mós iha rai li’ur
“Ha’u rasik kontente no agradese ba MTCI tanba fó ona oportunidade ida ne’e hodi konvida ami mai tuir feira nasionál iha Dili inklui mós munisípiu sanulu resin tolu, maibé iha tinan 2008 ha’u rasik lori produtu artesanatu homan ne’e to’o iha nasaun Makau, hodi promove produtu artezanatu,” nia akresenta.
Olivia relata, grupu Lisatelu hetan apoiu primeiru husi NGO ADT , maibé ADT la’ós apoiu orsamentu , Maibe ho liafuan, no hatudu de’it dalan ba sira oinsá atividade Negosio ne’e bele la’o iha tempu naruk no hetan apoiu orsamentu husi MTCI ho osan montante dolar 1.000.00 ba kada grupu.
“Ami nia grupu Lisatelu hamriik iha tinan 2008, Iha grupu nia laran ami hamutuk na’in 15, ami hahú ho osan hamutuk dolar 50.00 to dolar 100.00, Atividade ne’ebé ami halo iha grupu ne’e mak hanesan homan pasta, ai-funan ,homan batar kulit sai fali ai-funan, no seluk tan,”Olivia Serão hakotu.
Jornalista : Domingas Viana
Editór : Orlando Magno
