(Dili) Mudansa – Foinsa’e Timor oan ne’ebé mai ho hanoin furak hodi motiva joven sira seluk liu husi ninia inovativu no kreativu tanba lakohi sai dependénsia ba família uma laran, entaun tenke halo netik buat ida iha loron ida hodi hetan ai-han ba loron ohin maski natoon.
Negosiante abrão de Araujo informa, buat ne’ebé motiva nia lakohi atu dependente ba inan-aman no família nia tenke foti risku hodi esforsu an buka rasik ai han ba loron ida nian liu husi ninia negósiu ki’ik ne’ebé dadaun ne’e nia hala’o hela iha merkadu Taibesi.
“Ha’u iha hanoin balun ne’ebé hakarak hato’o ba maluk joven sira, tenke halo buat ne’ebé mak úniku ba públiku nia matan, no labele garantia liu ba inan aman no família sira, maibé ita tenke tau aan hanesan ema joven ida hodi buka no kria rasik ita-nia hanoin atu halo buat foun ba ita-nia an,” dehan Abrão ba Media Mudansa iha Merkadu Taibesi Dili, kinta 19/01/2023.
Abrão afirma, sai ema joven ida tenke hakribi hahalok krime no mós halakon pensamentu brutalizmu kontribui nesesidade família nia liu husi ema ida-idak nia hanoin inovativu rasik.
“Hau nia malu joven sira labele envolve an iha konflitu oioin tanba la fó benefísiu ba ita-nia an, maibé tenke iha hanoin dame no unidade fó liman ba malu hodi hare ba ita-nia futuru oin mai,” nia rekomenda.
Abrão konta, durante hala’o negósiu to’o ohin loron nia hasoru dezafiu lubun ida maibé nunka iha hanoin atu hakat ba kotu tanba ho liafuan balu ne’ebé motiva nia mak Prosesu hanesan la’o iha nakukun laran maibé sei hetan naroman bainhira futuru termina ho susesu.
“Desafiu mak hanesan ba ha’u fatin laiha atu fa’an sasán, entaun ha’u deside fa’an iha terminál Taibesi maibé guarda munisípiu sira duni ha’u ba mai, ida ne’e mak dezafiu boot ne’ebé ha’u hasoru, maibé ha’u nunka atu lakon vontade atu hala’o negósiu ida ne’e, tanba nesesidade mak obriga,” nia deklara.
Abrão salienta, nia parte sente la du’un di’ak bainhira mane forte mak depende beibeik ba família, entaun ho hanoin hirak ne’e abrão deside hodi moris mesak halo negósiu hanesan fa’an sigarru, pulsa, plástiku, no mós sasán sira seluk.
Abrão de Araoju iha Feton maun alin iha uma laran sira hamutuk na’in neen kompostu husi feto na’in tolu no mane na’in tolu, Abrão maka oan ba da ikus iha família ne’e hamutuk na’in neen (6).
Estajiadu MD : Zemidonio Martins
Editór : Orlando Magno
