(Baucau) Mudansa – Ensinu Baziku Filial Maucale ne’ebé lokaliza iha suku Gariuai, Postu Administrativu Baucau, Munisípiu Baucau, la iha Biblioteka no manuál do alunu, maibé Prosesu Aprendizajen la’o normál.
Koordenadóra EBF Maucale, Ana Cesaltina Belo informa, prosesu aprendizajen iha EBF Maucale la’o ho di’ak, tanba planu kurikular ne’ebé iha entaun buat hotu la’o ho di’ak maibé sei falta biblioteka ba estudante sira atu aprende barak liu tan.
“Fasilidades eskola nian sufisiente maibé sei menus iha hariis fatin, biblioteka no manuál do alunu ba estudante sira,” dehan koordenadóra Ana ba Jornalista iha nia knaar fatin EBF Maucale, Gariuai, Baucau, Kinta 26/01/2023.
Nia hatutan, Estudante primeiru siklu no segundu siklu tuir aula iha dadeer to’o meudia no sira terseiru siklu tuir aula iha meudia to’o loraik.
“Ami iha ne’e totál estudante kada aula iha 30 no bele liu husi 30 ba leten maibé bele tun fali ba iha 20 kada aula” koordenadóra ne’e afirma
Enkuantu, Kona-ba atividades desportu iha eskola sira sempre realiza, maibé atu hodi estudante sai ba fatin seluk mak la iha tanba distánsia no estudante sira ho idade ki’ik.
“Ha’u rekomenda ba governu se bele halo moru hale’u eskola EBF Maucale, tanba ami hakarak kria ambiente ne’ebé di’ak no saudavel ba eskola no estudante sira presiza iha moru ne’ebé hale’u eskola,” nia sujere.
Iha fatin Hanesan, Reprezentante estudante EBF Maucale, Zelia Ximenes haktuir, nu’udar estudante nia sente kontente bainhira ba eskola tuir prosesu aprendizajen ho di’ak maibé nia mós sente triste tanba la iha biblioteka ba sira atu lee livru.
“Ami la’o husi Fatumaka mak mai eskola iha EBF Maucale, ami sente kontente tanba profesores sira hanorin ho di’ak” Zelia argumenta
Tuir dadus,Total estudante husi primeiru siklu no segundu siklu iha EBF Maucale ne’e hamutuk 145, no profesór hamutuk na’in sanulu (10) permanente na’in neen (6) kontratadu na’in rua (2), parte tempu na’in 2, sira ne’ebé mak kontratadu no parte tempu sira nia naran submete ona ba vaga edukasaun nian foin lalais ne’e, maibé oinsá atu ba oin ne’e kompeténsia Edukasaun nian
Jornalista : Sandy Belo
Editór : Orlando Magno
