(Dili) Mudansa – ema ida-idak hatudu nia forsa ho vontade tomak la’o hale’u Sidade Dili la sente baruk no kolen tanba hakarak hetan dolar (osan) hodi hakmaan haforsa nesesidade uma laran maski la’o iha loro-manas maibé nafatin hakat ho objetivu ne’ebé planeia ona.
Kriatura maromak nia ne’ebé hela iha lalehan nia okos no iha rai nia leten ida-idak ho nia esperiénsia rasik balu moris di’ak iha mós ema balu moris iha terus no susar nia laran maibé ema ida-idak responsabilidade ba nia moris.
Negosiante Felianos Do Santos Bubu informa, fa’an Haas iha tempu feriadu, hale’u sidade Dili laran buka osan molok tama fali eskola iha Oe-kuse nune’e labele fó todan no garantia beibeik ba família liuliu inan-aman.
“Hau Hela iha Taibesi ho família Sira, dadeer-saan Hau hakat sai husi odamatan la’o Husi Taibesi mai to’o iha ne’e no ba fatin seluk, nune’e bele hetan netik osan uitoan hodi prepara ba ha’u-nia eskola sosa kadernu, lapizeira no seluk tan ne’ebé Hau presiza,” dehan Felianos ba média mudansa iha Largo Lecidere Dili, Sexta, 25/11/2022.
Nia relata, bainhira ezame hotu husi eskola fó feriadu ba estudante sira, entaun Felianos sempre aproveita tempu husi Oe-kusse mai hala’o negósiu ki’ik iha sidade Dili tanba nia lakohi husik tempu lakon leet de’it.
“Hau fa’an hahú iha tinan kotuk 2021, bainhira tempu feriadu Mak Hau Mai fa’an haas ne’e, no tempu eskola tama Hau Fila fali ba Oe-kusse, tan ne’e Ba Maluk sira ne’ebé iha tempu livre tenke aproveita halo negósiu ki’ik hodi sustenta ba Ita Nia presiza, molok tama fali eskola, maibé keta gasta tempu ba buat ne’ebé la vale mai ita,” nia rekomenda.
Felianos iha maun alin na’in haat (4) Felianos Mak oan Da tolu (3),No Origen Husi Aldeia Ulas Suku Taiboko Postu Nitibe, Rejiaun Administrativu Espesial Oe-kusse Ambeno (RAEOA).
“Hau Nia biin na’in Rua (2) Mak eskola iha Universidadae Nasional Timor Lorosa’e (UNTL) Hau Mak eskola iha Oe-kuse Primaria klase 5 no iha alin Ida tuir Hau Mak sei ki’ik,” nia deklara.
Iha sorin seluk, Ermelida De Jejus fa’an modo iha kapitál Timor-Leste hodi buka Moris sustenta uma laran no Haruka oan sira ba eskola tanba sira mak riin no abut ba rai ida ne’e.
“Hau hodi Osan 10/20$ ba Sosa tutan modo iha munisípiu Aileu lori Mai fa’an iha ne’e hodi Ajuda Laen buka osan, se karik Ema sosa modo ne’e hotu ha’u sente kontente uitoan mak la hotu ita sente lakon tanba osan inan labele fila atu sosa fali modo hodi kontinua fa’an,” Ermelinda deklara.
Iha fatin la hanesan, Vendedor Tais José Vasco dé Deus hatete, nia fa’an Tais hahú iha tempu indonézia ho folin $.15, Osan ne’ebé nia hetan uza ba labarik sira eskola, no mós sustenta uma nesesidade uma laran inklui halo ona uma ida hodi sira hela.
“Hau fa’an Tais depende BA situasaun ne’ebé di’ak, bele hetan $.20 dala ruma la’o to’o lokraik mós la hetan osan tanba ema la sosa,” José afirma.
José realsa, nia parte husu ba governu atu apoiu negosiante sira ne’ebé Faan Tais no prodús Tais, no mós apoiu produtu sira seluk iha Timor-Leste.
“Hau Nia rekomendasaun ba parte governu tenke apoiu ami tanba ita hotu hatene katak Tais Mak hanesan kultura Timor nian no tradisaun Timor nian, José sujere.
Estajiadu/á MD : Zimidonio Martins/Delfina Madeira Salsinha
Editór : Orlando Magno
