(Dili) Mudansa – Ema hotu presiza moris iha dame nia laran, tan ne’e joven sira tenke hapara ona hahalok krime hanesan tuda malu no oho malu maibé kontinua de’it estuda tanba futuru Timor iha joven nia liman.
Asuntu ne’e hato’o husi Prezidente Repúblika Demokratika Timor-Leste (PRDTL), José Ramos Horta liu husi nia diskursu iha komemorasaun loron Nasionál Juventude Masakre Santa Krus 12 Novembru ba dala XXXI iha Santa Krus Dili, sábadu, 12/11/2022.
“Futuru Timor-Leste iha joven sira nia liman ne’e duni husu ba joven sira hotu hapara konflitu ka hahalok krime iha sosiedade nia leet nune’e bele moris iha dame nia laran atu imi estuda ho seguru no mós família sira bele moris hakmatek,” PRDTL Horta Esplika.
Horta informa, Timor-Leste Bele iha difikuldade oioin hanesan eletrisidade la iha, hahán la iha, bee mós la iha maibé joven sira nafatin estuda tanba ema ida-idak iha kapasidade rasik maibé balu haka’as kakutak balu fali lae, ida ne’e mak diferensia.
“Hau apelu ba joven sira ne’ebé gosta foti fatuk tuda malu favór para ona ho ida ne’e, buka mak estuda no mós buka servisu iha Timor, tanba servisu la’os de’it ba li’ur maibé bele halo servisu hanesan ita-nia maluk negosiante sira ou bele servisu seluk iha rai laran mós iha hela,” Horta relata.
Xefe Estadu Ramos Horta argumenta, joven hotu-hotu Tenke kontribui ba pás no estabilidade iha rai laran no mós hametin amizade liu husi amigu tanba Timor-Leste laiha ona inimigu.
Jornalista : Ekipa MediaMudansa
Editór : Orlando Magno
