(Dili), Mudansa – Gabriel Oliveira de Araujo hanesan Foinsae Timor oan ida ne’ebé ho kondisaun defisiente fíziku iha hanoin ida hakarak juventude Republika Demokratika Timor-Leste (RDTL), atu tau liman hamutuk hodi halo morin RDTL tanba inimigu la eziste ona iha Timor.
Gabriel hato’o lia hirak ne’e ba MediaMudansa hafoin remata serimónia komemorasaun loron Nasionàl Juventude 12 novembru Masakre Santa Kruz ba dala XXXI, iha Santa Krus Dili, 12/11/2022.
“Maluk joven sira Mai ita hamutuk hamorin Timor-Leste hodi valoriza sobrevivente sira nia sofrimentu ne’ebé sira sente iha momentu liu ba tanba agora la’ós ona tempu atu halo problema tanba ita la iha ona inimigu,” dehan Difisiente Fiziku Gabriel.
Defisiente fíziku ne’e informa, maski kondisaun defisiénsia maibé ho esperansa no domin tomak Gabriel hakarak partisipa iha komemorasaun loron nasionál juventude tanba loron ohin espesiál tebes ba Joven Timor-Leste entaun nia la preokupa ho loro-manas.
“Nuudar jerasaun foun husu ba sobrevivente tomak nafatin sai ezemplár ba joven sira agora ne’e tanba uluk ita boot (sobrevivente) sira maka fó an ba mate hodi loke odamatan ba ukun rasik an,” Grabriel rekomenda.
Nia relata, Akontesimentu iha loron 12 fulan novembru tinan 1991 ne’e hanesan save ne’ebé ohin loron Timor oan hotu goza ukun rasik an nune’e mós mundu hatene ona Timor-Leste nia sofrimentu iha momentu ne’ebá.
“Ita mak juventude Timor-Leste, ita mak foin-sa’e rai ne’e nian tenke hatudu profisionalizmu ba mundu katak Timor oan mós bele luta ba dezenvolvimentu maibé luta hamoe Timor-Leste ne’e la’ós jerasaun rai ida ne’e ko’alia kasar Milisia nia oan,” Gabriel esplika.
Nia deklara, Uluk nasaun viziñu mak ukun rai ida ne’e maibé agora Timor-Leste ukun an ona joven sira tenke fó liman ba malu hakribi hahalok krime hodi serví ba rai ida ne’e liu husi kontribuisaun pás no dame iha rai laran tanba ema barak mak terus no mate ba rai Timor.
Jornalista : Ekipa MediaMudansa
Editór : Orlando Magno
