(Dili), Mudansa – Komandante Ekipa, Kompaña Operasoens Espesial (COE-sigla Portuges) Hafoin simu orientasaun hosi Komandu Unidade Espesial Polisia, hodi reforsa PNTL Munisipiu Dili halo operasaun la’o ain tama sai bairru hodi kontrola situasaun aproveita mós fó hanoin ba joven ne’ebé kondus motorizada la uza kapasete tanba ema nia ulun fa’an iha loja la iha.
Husi Observasaun iha terenu hare Komandante Ekipa Kompaña COE ne’ebé lakohi fó sai identidade, nafatin fó hanoin ba públiku atu respeita lei tránzitu nian tanba tuir observasaun membru COE nota joven barak tula malu ho motór viola kódigu estrada la uza kapasete.
Nia parte husu nafatin ba públiku sira bainhira kapasete la iha lalika tula ema tanba dezastre ne’ebé akontese ema hotu la espera.
“Hatete ba Ita-Boot sira ami hala’o servisu ida ne’e tuir orden husi ami nia superiór sira, tan ne’e ami fó hanoin ba imi, bainhira uza motór obrigatoriamente uza kapasete tanba ema nia ulun fa’an iha loja la iha maibé kapasete barak ema fa’an iha loja ne’ebá,” komandante Ekipa COE fó hanoin ba motorista bainhira halo operasaun la’o ain iha área Ponte Comoro 3, sesta madrugada, 11/11/2022.
Komandante Ekipa ne’e nafatin sujere atu ema hotu labele egoísta bainhira kondus motór maibé presiza maka ema hotu atu koopera ho parte seguransa hodi kontribui ba estabilidade iha rai laran.
“Ita boot sira lori motór labele hanoin de’it imi-nia an maibé hanoin mós kolega ne’ebé ita boot sira tula, se ita boot nia pasajeiru ka kolega ne’ebé ita tula ne’e, la uza kapasete bainhira hetan dezastre ruma ulun nakfera atu fó sala ba se”, nia sujere.
Observasaun Media Mudansa nia iha terenu nota katak, ekipa konjunta ne’e hala’o operasaun la’o ain tama sai bairru iha Dili laran no mós halo pasa revista hodi haree sasán kro’at iha motorista no ema la’o ain ne’ebé halo movimentu iha tempu kalan.
Jornalista : MediaMudansa
Editór : Orlando Magno
