(Díli), Largo Lecidere, 18/06/2026 – Iha área Largo Lecidere, Norveiro de Almeida kontinua fa’an nu’u ho esperansa boot atu ajuda sustenta nia família no garante edukasaun ba nia alin sira. Jovem ne’ebé mai husi Munisípiu Baukau ne’e hili atu hahú negósiu ki’ik ida hanesan dalan atu enfrenta dezafiu kampu traballu ne’ebé sei limitadu iha Timor-Leste.
Ho osan montante hamutuk $50, Norveiro hahú nia negósiu no kontinua luta durante tinan barak atu bele hetan rendimentu ba nesesidade loron-loron, maske la fasil, nia la lakon vontade atu servisu no buka oportunidade ba an rasik.
“Bainhira ita hela de’it iha uma, ita labele muda ita nia moris, tanba ne’e ha’u deside hahú negósiu rasik,” hateten Norveiro iha Largo 18/06/2026.
Nia relata katak hahú fa’an nu’u desde tinan 2017,durante tinan hirak ne’e, nia pasa ona esperiénsia oin-oin, inklui mudansa fatin fa’an tuir orientasaun Governu no dezenvolvimentu infraestrutura iha kapital, uluk nia fa’an iha área Loja Litastore, depois muda ba Ponte BJ Habibie no ikus mai ba Largo Lecidere.
Maski atividade komersiál ne’e ajuda sustenta moris, Norveiro atualmente vendedor sira enfrenta dezafiu barak liután kompara ho tempu uluk fiskalizasaun no kontrolu ne’ebé aumenta iha área fa’an sira dala ruma afeta movimentu konsumidor sira.
“Ita agora sei fa’an, maibé presiza adapta ho regra sira ne’ebé iha ida-ne’e afeta movimentu konsumidor sira atu mai sosa,” nia dehan.
Rendimentu loron-loron husi negósiu ne’e bele to’o $40, depende ba kondisaun tempu no númeru kliente sira ne’ebé mai sosa, osan ne’ebé nia hetan la’ós de’it atu sustenta família, maibé mós atu ajuda edukasaun nia alin sira no investe ba futuru an rasik.
Atualmente, Norveiro tuir kursu língua inglesa iha KSTL Bemori, Díli nia espera katak edukasaun no abilidade foun sira bele loke oportunidade di’ak liu tán iha futuru.
Iha família ida ho maun-alin na’in haat, Norveiro hili atu sakrifika nia estudu superior tanba limitasaun ekonomia, nia deside servisu hodi fó oportunidade ba alin sira atu kontinua estudu, inklui sira ne’ebé agora hela iha universidade no ensinu sekundáriu.
Istória Norveiro sai ezemplu ida kona-ba juventude Timor oan sira ne’ebé la hein oportunidade mai rasik, maibé uza kreatividade, perseveransa no servisu maka’as atu harii moris di’ak liután ba família no komunidade, entre limitasaun kampu traballu no dezafiu ekonomia, nia luta loron-loron hatudu katak esperansa no determinasaun sei bele lori mudansa ba futuru.
Jornalista : Osterlia Muni
Editor :Ana Maria da Silva
