(Dili) Mudansa – Feto ida hatudu ninia badinas no la moe halo negósiu ki’ik ne’ebé ema balun labele halo maski sente todan ou kmaan maibé nia nunka atu rende tanba hakarak responde nesesidade uma laran ho intensaun ida katak halo negósiu la’ós atu sai riku maibé loron ohin la hanesan ho loron aban.
Situasaun ne’e akontese ba negosiante ambulante Lucia de Jesus Ferdial (24), ne’ebé konta nia istória negósiu nian ba jornalista MediaMudansa iha nia fa’an fatin Taibesi Dili, tersa 22/11/2022.
Lucia informa, sasán ne’ebé nia fa’an la preokupa ema atu sosa ka lae maibé nia nafatin esforsu an hodi fa’an liis tanba atu responde nesesidade uma laran la’ós tuur iha kadeira doko ain de’it.
“Hau fa’an Lis atu sustenta moris la’ós hakarak sai riku, entaun liis ne’ebé ha’u fa’an, ema sosa ka lae mós ha’u nafatin fa’an ho kontente atu uitoan ka barak importante bele sustenta moris, tanba forma ona família tenke esforsu an buka osan hodi maibé ita la hatene tanba loron ohin la hanesan ho loron Aban,” Lucia Informa.
Nia haktuir, bainhira fa’an sasán mak Ema la Sosa la bele triste no lakon vontade maibé nafatin esforsu an halo negósiu hodi sustenta moris.
“Ha’u fa’an liis ne’e kuaze to’o ona tinan Ida bainhira ema sosa entaun ha’u fó osan uitoan ba inan aman, no mós osan balu ha’u rai de’it, hodi sosa fali liis nune’e ha’u-nia negósiu la bele para iha dalan klaran,” Lucia relata.
Nia argumenta, Lucia sosa liis ho folin dolar 7 dala ruma dolar 8 iha loja depois fa’an fali Iha merkadu husi dadeer tuku sanulu resin rua nia Fila ba uma kontinua fali iha oras lokraik.
Jornalista : Domingas Viana
Editór : Orlando Magno
