(Dili), Mudansa — Nuu-Kakun la folin iha ema nia matan maibe folin boot iha ema ne’ebé iha hanoin kreativu tanba bele hetan lukru husi Nuu-Kakun hodi responde ba nesesidade uma laran, no mós hakarak loke kampu servisu ba joven sira..
Foinsa’e Timoroan ida ho naran, Zeferino da Costa Miranda ho naran koñesdu “Zheffy Malay Art”, iha telentu mai ho natureza kreatividade artezenatu, pinturas, no mós bele transforma Nuu-Kakun ba buli, kaneka, sinjeiru.
Zheffy tur hela ho nia kolega hodi hein sira nia produtu ne’ebe fa’an iha eis edifisiu Embaixada Portugal Formoza Dili. Photo Azelio da Cruz
“Esperiensia ne’ebé ha’u hetan hodi halo produsaun ne’e, dala barak haree husi youtube, hodi reforsa ha’u nia kapasidade, tanba ne’e Planu ba oin hakarak kria kampu servisu ba maluk sira ne’ebé hakarak aprende hamutuk ho ami,” dehan Zheffy hafoin tuir feira, ne’ebe organiza husi CCI-TL, iha Eix Edifisiu Embaixada Portugal Formoza Dili, foin lalais.
Zheffy hateten, bai-bain sira halo, gantungan kunci tara ba pasta, no mós pinta ema nia foto, tanba sira halo bazeia ba buat ne’ebé sira bele halo tuir kapasidade ne’ebé sira iha.
“Ha’u rasik iha inisiativa atu produs sasan sira ne’e ba faan, hodi hetan lukru entaun buli ida folin $.30.00 Kaneka, no sinjeiru presu la hanesan, Material ne’ebé ami uza iha produsaun maka, gurinda, lisa, tinta no lem ai nian,” Zheffy esplika.
Nia informa, kada fulan Zheffy bele hetan dolar 100.00, osan sira ne’e nia uza ba nesesidade uma laran no balu rai hela hodi selu eskola, maibé atividade ne’e Hahu ho osan $.50.00 sosa material ne’ebé presiza atu halo produsaun ba produtu ne’ebe sira produs.
“Ami na’in 10 resin maioria estudante, grupu ne’e hahu iha 2019, ne’ebé foka liu ba turistiku no artezenatu, , maibé agora ami seidauk iha estrutura tanba ida-idak foku ba nia atividade,” Zheffy relata.
Membru grupu JHOVAL halibur joven kreatividade, Novelino Francisco da Sousa Lay argumenta, grupu ne’e ida-idak kria nia obra tanba ema ida ho nia kreatividade rasik, bainhira tempu livre mak hamutuk halo produsaun.Membru Grupu JHOVAL Novelino dada lia hela ho Jornalista Media mudansa.
Novelino akresenta, nia parte pinta de’it imagen, antigu hodi hatudu fatin istoriku iha Timor ba ema hotu liu husi pintura ne’ebé sira pinta ona.
“Ha’u pinta fila fali, Igreja Motaiel, Katedral, Igreja Avemaria Suai, Edifisiu BNU, Ultra Marina, Kaza Uniaun Europeia, imagen sira seluk sei iha hela prosesu nia laran. Ohin estranjeira balu sosa ona imagen lima hamutuk dolar 75.00,” Novelino realsa.
Nia dehan, Material baziku ne’ebé nia uja ba pintura mak hanesan lapis, kóres no espidol, hirak ne’e mak nia uza hodi pinta sai imajen ne’ebé furak iha ema nia matan borus iha fuan.
“Ha’u nia talentu husi kiik to’o agora hakarak pinta de’it, Aleinde pintura Ha’u mós iha arte resiklazen hanesan halo binkai uza sipu hodi tau imajen ne’ebé pinta ona,” nia konta.Novelino simu osan hafoin kompradora sosa nia produtu (pintura). Photo Azelio da Cruz
Novelino afirma, nia pinta ema nia imajen la’os de’it iha surat tahan maibé bele pinta iha tais tanba ne’e bainhira hetan opportunidade nia hakarak tuir expozisaun pintura iha rai laran.
Nia deklara, atividade ne’e la iha ema ida maka suporta nia maibé osan ne’ebé nia uza hetan husi ninia obra rasik tanba ema barak koñese ona nia atu pinta imajen furak.
“Ha’u hetan osan husi kompestisaun ne’ebé maka guvernu no NGO lókal loke, kuaze $.500.00 resin mak ha’u hetan, Osan ne’e Ha’u uza ba nesesidade uma laran, eskola, no hola material ba Ha’u nia pinturas sira ne’e,” nia akresenta.
Novelino Photo hamutuk ho Estranjeira Autraliana Khafing hodi hatudu pintura neebe kompradora sosa. Photo Azelio da Cruz
Iha fatin hanesan kompradóra estranzeiru australianu, Khafing afirma, nia parte sente gosta no laran monu ba pintura ne’ebé joven sira pinta ona tanba relevante ho istoria Timor.
“Ha’u gosta kreatividade Timoroan, tanba uluk ha’u mós suporta artis, Gembel, Artemoris, maibé dezeñu ida ne’e diferente tanba ha’u gosta ninia inisiativa no kreatividade ho ida ne’e maka Ha’u sosa imajen ne’e,” Khafing hakotu.
