(Dili), Mudansa – Prezidente Ezekutivu Fundasaun Cristal Agostinho dos Santo Gonçalves informa, Instituisaun Edukativa Cristal-Fundação Cristal (IEC-FC), Festeza Loron Mundial Labarik (LML), ho atividade Kompetisaun no husu ba Profesores atu hanorin labarik sira ho domin.
“Husu ba Diretor no professor/a sira atu tau atensaun hodi haree Criança sira nia problema iha formasaun edukasaun atu professor sira la bele hanorin labarik sira ho forsa no hirus maibé hanorin tenke ho domin, atu sira bele iha fuan hadomi ba ema hotu bainhira sai lider iha futuru,” dehan PEFC Agostinho liu husi nia dirkursu iha IEC-FC Balide Dili. (Kuarta, 01/06/2022).
Prezidente Ezekutivu FC Agostinho afirma, 01 Juñu mundu tomak inklui Timor-Leste selebra loron mundial ba Labarik sira tanba nee, Fundasaun Cristal organiza hodi realiza eventu kompetisaun hanesan Halai Karon, halai Berlindu, no mos tata Grupuk hodi festeza loron espesial ba labarik sira.
“Iha kompetisaun ne’e labarik sira ne’ebé hetan primeiru, Segundu no Terseiru Lugar hetan premiu, matrial eskola hanesan Kadernu Lapijeira no seluk tan,” Prezidente Ezekutivu FC Agostinho deklara.
Nia relata, IEC-FC iha programa ida atu ko’alia ho inan aman sira hodi fo atensaun ba problema Crianças nia iha uma tanba labarik sira nee mak aban bainrua sai joven no sai lider nasaun nian iha futuru oin mai, Maske sira sala maibe inan ho aman nafatin eduka sira ho didi’ak.
“Husu mos ba Labarik sira atu hadomi nafatin inan aman núne’e ba futuru sai lideransa karik bele hadomi ema hotu hanesan imi hadomi inan aman,” Agostinho esplika.
Prezidente Ezekutivu Fundasaun Cristal Agostinho dos Santo Gonçalves lori IEC-FC nia naran hato’o Parabens ba Labarik sira iha mundu tomak inklui iha Timor-Leste espesial ba Criança sira iha Instituisaun Edukativa Cristal-Fundação Cristal.
Entretantu tuir dadus ne’ebe media online Mudansa.info asesu katak, labarik sira ne’ebé ohin partisipa iha atividade kompetisaun hamutuk nian 66 neebe kompostu husi ensinu Basiku 1°, 2° no 3° siklu.
Ekipa ; MD
