(Dili), Mudansa – Ministeriu Turismu Komersiu Industria (sigla Portugues MTCI) servisu hamutuk ho United Nations Development Programme (UNDP) fó apoiu ona ba joven kreativu sira ho orsamentu totál dolar 300,000.00 liuhosi kompetisaun negosiu inovativu hahu hosi 2021.
Iha tinan ida ne’e Ministeriu Turismu Komersiu Industria (sigla Portugues MTCI) ho United Nations Development Programme (UNDP) realiza kompetisaun negosiu inovativu ne’e ba daruak ho aplikante hamutuk 266.
Gestor Projetu SEEWAY, Franselino Guteres hateten, UNDP servisu hamutuk ho governu liu husi MTCI apoiu emprendedorizmu projeta ba joven sira liuhosi suporta porgrama kompetisaun negosiu inovativu ne’ebé klasifika ba komponente ha’at ne’ebé dedika ba joven sira.
“Programa dahuluk mak, fasilita estajiu ba foinsa’e iha ne’ebé kada periodu UNDP rekruta joven sira ba fatin rekursu adisionál sira. Segundu, programa emprendedorizmu iha ne’ebé, UNDP fó oportunidade ba joven sira tuir hodi formasaun hafoin hetan ekipamentu husi UNDP mak sira estabelese sira nia negosiu,”dehan Jestór Projetu SEEWAY Franselino, iha CCD, Kaikoli Dili, (foin lalais ne’e).
Programa terseiru maka kompetisaun negosiu inovativu, ho eskala ne’ebé bo’ot UNDP rejistu no realiza iha 2021 joven lubuk ida to’o final maibé joven hamutuk 26 de’it mak hetan apoui husi guvernu no dadaun ne’e sira nia negosiu la’o hela.
Franselino afirma, Periodu 2022 fulan Maiu loke aplikasaun ba kompetidór, hafoin sira avansa ba kompete durante semana rua nia laran, totál husi aplikante emprendedorizmu hamutuk 266, maibé iha faze seleksaun dokumentu emprendedorizmu hamutuk 50 resin mak pasa.
“Kompetidór sira ne’ebé mak selesionadu sei hetan orsamentu ne’ebé apoiu hosi governu, normalmente ita halo selesaun bazea ba termu ne’ebé aplikavél, no hanorin sira uja business canvas model,” dehan Jestór Projetu SEEWAY Franselino.
Nia relata, kompetisaun negosiu inovativo ba emprezariu foinsae sira ne’e inisia iha tinan 2020, ho orsamentu hamutuk, $.200,000.00 no tinan 2022 orsamentu hamutuk $.100,000.00, objetivu atu ajuda joventude inovativu no kriatvu iha parte negosiu nian.
Entretantu kompetisaun refere manan nain dahuluk sei hetan orsamentu ho total $ 2,250.00 no manan ba daruak hetan $ 1,500.00 inklui manan nain ba datoluk ho total orsamento $ 1,250.00 hodi apoiu sira nia aktividade negosiu.
Ekipa :MD
