(Dili) Mudansa– Joven foisa’e ho naran Juvita Fernandes ho nia kreatividade halo negosiu Bumbu Kaldo lokál ho modelu Massako iha Timor Leste,hodi kompete iha negosiu inovativu daruak nebe’e maka loke husi oraganizasaun UNDP no MTCI ho objetivu promove abilidade joventude sira nian iha area negosiu no mós haforsa empreza foinsa’e hodi kontribui ba desenvolvimentu ekonomia sustentavel.
Hafoin intervista manajer bumbu lokal Juvita fernandes, senti kontente wainhira hetan terseiru lugar iha kompetisaun negosiu inovativu II, maibé ne’e la’ós sasukat ba nia atu kontenti deit, sei nafatin kontinua lori nia produtu ba kompete iha merkadu.
“ha’u halo Bumbu kaldo lokál , ida ne’e husi temperus ne’ebé maka hetan iha Timor-Leste, ha’u senti orgollu tebes tanba liuhusi oportudade ida ne’e bele ajuda ha’u atu dezenvolve ha’u nia negosiu ne’ebé maka iha tempu badak sei halo lansamentu, no programa ne’e kapaas teb-tebes , ikus mai ha’u nia mehi bele realiza tempu agora,” Hateten manajer bumbu lokál Juvita fernandes ba Jornalista mudansa.info, CCD, Dilí, (02/06/22).
Nia hatutan, planu ne’ebe realiza iha tempu badak mak, nia sei lori nia produtu bumbu lokál ka temperu lokál ba kompete iha merkadu no posibilidade bele halo mós exportasaun ba rai liur, hodi hatudu katak Timor-Leste mós iha temperu lokál ne’ebé bele fasilita ema hotu bele konsumu ho kualidade ne’ebé mak di’ak.
“ha’u Planu ba oin maka atu bele dezenvolve liu tan ha’u nia negosiu ne’e, tanba ida ne’e mak ha’u nia vida, ne’e mak ha’u nia moris, ne’e mak ha’u nia hanoin duni, no mehi bo’ot nebe’e hau iha mak sei hatama hau nia produtu sira ba merkadu, posibilidade mós exporta ba rai liur,”nai hatutan.
Nia deklara, la’os de’it kria kampu traballu ba nia an maibe nia mós sei halo mudansa ba joventude timoroan ne’ebe mak seidauk iha kampu servisu iha nia rain rasik.
“Depois de ida ne’e ha’u mós hakarak loke kampu trabalhu ba ha’u nia maluk joven sira ne’ebe maka seidauk hetan servisu no halo rekrutamentu mós Timor-oan sira atu servisu hamutuk ho ha’u hodi bele dezenvolve ita nia nasaun ida ne’e,”nia deklara.
nune’e nia hato’o mensajem ba emprezariu joventude timoroan ne’ebe mak hakarak kontribui ba ekonomia sustentavel iha nia rain rasik presija esforsu an iha negosiu no labele tauk, iha konhesimentu ki’ik maibe nafatin kompete iha parte negosiu hodi bele desenvolve nasaun Timor-Leste.
Entretantu total husi orsamentu nebe’e maka nia(Juvita fernandes) hetan husi UNDP no MTCI hamutuk dollar amerikanu $ 1250.00 hanesan premiu kompetisaun negosiu inovativo ii MTCI 2022 promove abilidade ba future no inklui haforsa empreza foinsae sira hodi kontribui ba desenvolvimentu ekonomia sustentavel.
Jornalista : Manuel Andrade
Editór : Azelio
