(Dili), Mudansa – Negosiante Margarida Salsinha Martins feto ne’ebé fuan boot nakonu ho pasiensia no domin hodi esforsu aan liu husi dalan negosiu nian, atu responde ba nesesidade uma laran no suporta oan sira asesu edukasaun.
Maibé realidade moruk ne’ebe hatudu ba Negosiante Margarida maka bainhira produtu ne’ebé nia fa’an, la folin tanba ema la sosa, konserteja fila ba uma la sosa nesesidade uma laran no mós oan sira nia material eskola.
“Ha’u hodi modo ba mai hanesan ne’e, ema la hola to’o Ai-fuan no modo balu dodok, maibe ha’u nafatin pasiensia, bainhira fila ba uma oan sira dehan, ama fila mai la lori sasan (Oleh-Oleh) husi Dili, maibé ho domin ha’u hatan, oan sasan la folin ida,” dehan Margarida ba Jornalista Mudansa iha nia faan fatin merkadu Taibesi Dili, (Domingu, 19/02/2022).
Negosiante Margarida relata, Iha loron segunda to sesta sira labele faan iha merkadu Taibesi, tanba Wali kota ka Siguransa duni sira la bele fa’an iha terminal Taibesi, maibe Sabadu ho domingu maka sira foin fa’an iha ne’e,
“Ami sente triste lós, Kuitadu ami atu halo oinsa? ba merkadu laran fatin ba ami la iha atu fa’an ami nia modo maske tinan barak ona ha’u ho kolega mai faan iha ne’e (Merkadu Taibesi),” Margarida esplika.
Nia afirma, Ai-manas, saburaka, fehuk, talas, hirak ne’e sosa iha saku ida ho folin $.15.00, fa’an fali sabraka fuan 5 $.1.00, koto saku ki’ik $.50.00, fan fali lata ida Centavus 0.50, fehuk mós hanesan.
Nia konta, banhira Margarida sa’e kareta tenke selu dollar 6 tanba mina folin sa’e, maibe konaba sasan selu ketak tanba saku ida selu $1.00 bele $.1.50, ba mai hamutuk dollar 20 resin.
“Kuitadu dala ruma ema la hola ami nia produtu entaun ha’u fila ba uma lalori buat ida, karik ema sosa mak ita bele hola netik fós, rinso, sabaun, no mos labarik sira nia kadernu, ropa, no seluk tan maibe depende ba ema sosa ita nia sasan,” negosiante Margarida esplika.
Negosiante Margarida Salsinha Martins moris iha Ermera 02/02/1968, Aldeia Duhoho Suku Katrai-leten, Postu Administrativu Letefoho, Munisipiu Ermera, no mós Magarida iha oan mane nain 6 feto la iha, hirak nee hotu, nain rua eskola iha letefoho, no nain haat eskola Gleno
Jornalista : Azelio da Cruz
Editór : Orlando Magno
