(Díli), Katedral 09/09/2026 – Sua Eminénsia Dom Virgílio Cardeal do Carmo da Silva, SDB, hato’o agradesimentu ba Primeiru-Ministru no IX Governu Konstitusionál tanba inisiativa atu hari’i monumentu ida nu’udar fatin memória ba ema sira ne’ebé konsidera iha istória Igreja Katólika no povu Timor-Leste, inklui Amu Lulik no Madre sira.
Dom Virgílio hatete katak inisiativa atu hari’i monumentu ne’e mai husi Primeiru-Ministru rasik, ho objetivu atu preserva no hanoin nafatin memória ema sira ne’ebé iha kontribuisaun importante iha istória Igreja no povu Timor-Leste.
“Inisiativa ne’e mai husi Primeiru-Ministru rasik, ne’ebé husu atu hari’i monumentu ida hodi preserva no hanoin memória ema sira ne’ebé konsidera iha história Igreja no povu Timor-Leste,” hateten Dom Virgílio Cardeal do Carmo da Silva iha Katedral 09/09/2026.
Nia mós esplika katak, iha faze inísiu, parte sira enfrenta konsiderasaun kona-ba disponibilidade fatin, tanba área ne’ebé disponivel limitadu maibé, liu-husi diskusaun no kooperasaun entre parte sira, ikus mai ema hotu konkorda atu kontinua hala’o projetu ne’e.
“Iha prosesu inísiu iha konsiderasaun kona-ba disponibilidade fatin, tanba área ne’ebé disponivel limitadu. Depois husi diskusaun no kooperasaun entre parte sira, parte hotu konkorda atu kontinua hala’o projetu ne’e,” nia hateten.
Tuir Dom Virgílio, monumentu ne’e la’ós de’it estrutura físika, maibé iha valor importante hanesan fatin memória ba gerasaun sira agora no future ,fatin ne’e bele ajuda komunidade, bispu, padre no visitante sira atu komprende kle’an liután kona-ba papel Igreja Katólika iha Timor-Leste.
“Monumentu ne’e iha valor hanesan fatin memória, ne’ebé bele ajuda komunidade, Bispu, Padre no visitante sira atu komprende liután kona-ba papel Igreja Katólika iha Timor-Leste, liuliu durante períodu difísil to’o ukun-rasik-an,” nia esplika.
Iha okaziaun ne’e, Dom Virgílio mós hato’o agradesimentu ba IX Governu Konstitusionál, liu-liu Primeiru-Ministru no Ministru Obras Públikas, tanba apoiu no kooperasaun ne’ebé fó ba realizasaun obra monumentu ne’e.
Nia konsidera katak kooperasaun entre parte sira hotu mak fator importante ne’ebé permite projetu ne’e realiza no sai nu’udar espasu ida ba memória no aprendizajen kona-ba istória Igreja no povu Timor-Leste.
Dom Virgílio mós la haluha hato’o agradecimentu ba kompanhia sira no parte hotu ne’ebé kontribui no envolve diretamente iha realizasaun obra monumentu ne’e.
Jornalista: Madalena de Lima
Editor: Ana Maria da Silva
