(Díli), Kampus Central 08/092026 – Preokupasaun kona-ba alegasaun kobransa ilegal no abuzu podér iha Universidade Nasional Timor Lorosa’e (UNTL) kontinua sai atensaun iha komunidade estudante, Asosiasaun Akademika Estudante Faculdade Edukasaun, Artes no Humanidades (AAE-FEAH), hamutuk ho estudante ativu no finalista sira, husu UNTL no Konsellu Disiplinar atu lalais fó desizaun kona-ba kazu sira ne’ebé, tuir sira, hela prosesu liu ona fulan rua.
AAE FEAH konsidera katak prosesu ne’ebé kleur seidauk iha rezultadu bele hamosu preokupasaun kona-ba justisa no transparénsia iha universidade tanba ne’e, asosiasaun ne’e hato’o pedidu ba estrutura UNTL atu fó atensaun séria ba alegasaun sira ne’ebé mosu iha Departamentu Lian Tetun no Departamentu Fizika.
Portavoz AAE FEAH, Célcio Sávio Pinto, hateten katak asosiasaun nia papel mak reprezenta no defende interese estudante sira, liu-liu bainhira iha problema ne’ebé afeta direitu akademiku.
“Asosiasaun Akademika nia papel mak reprezenta no defende estudante sira tanba ne’e, ami husu universidade atu fó atensaun séria ba problema sira ne’ebé akontese iha Departamentu Lian Tetun no Departamentu Fizika.” hatete Portavoz AAE FEAH, Célcio Sávio Pinto iha Kampus Central 08/092026.
Sekretáriu AAE FEAH, Benjami Geovanio Matos, esplika katak ida hosi kazu ne’ebé asosiasaun lori ba universidade mak alegasaun kona-ba kobransa ilegal iha Departamentu Lian Tetun, ne’ebé, tuir sira, akontese desde 2017.
Tuir Benjami, hatutan katak estudante sira kontribui osan ba atividade no material akademiku, maibé iha estudante balu ne’ebé alega katak promessa kona-ba uza ka fornese material sira ne’e la kumpri.
Kazu ne’e, tuir nia, submete ona ba Magnífiku Reitor no Konsellu Disiplinar atu hetan prosesu tuir mekanismu ne’ebé iha.
“Ami submete ona kazu hirak ne’e ba Magnífiku Reitor no Konsellu Disiplinar maibé to’o agora seidauk iha rezultadu ne’ebé fó justisa ba estudante sira.”
Alémde ne’e mos hosi Departamentu Lian Tetun, AAE FEAH mós hato’o alegasaun kona-ba abuzu podér iha Departamentu Fizika. Asosiasaun ne’e afirma katak alegasaun envolve manipulasaun dokumentu no nota estudante sira.
Maibé, alegasaun hirak ne’e sei iha prosesu no, to’o agora, seidauk iha desizaun ofisiál ne’ebé publika hosi estrutura universidade ka Konsellu Disiplinar.
AAE FEAH fó prazu loron tolu ba estrutura UNTL no Konsellu Disiplinar atu fó resposta kona-ba kazu hirak ne’e. Asosiasaun ne’e hateten katak, karik la iha resposta iha tempu ne’ebé determina, estudante ativu no finalista sira sei organiza asaun pasífika iha FEAH.
Benjami subliña katak objetivu hosi asaun ne’e mak atu husu klarifikasaun no rezolusaun ba problema sira, la’ós atu hamosu intimidasaun.
“Karik to’o loron tolu laiha resposta, ami sei organiza asaun pasífika atu husu universidade rezolve lalais problema hirak ne’e ami hakarak justisa no transparénsia, la’ós intimidasaun.”
AAE FEAH, iha nia pozisaun, mós husu Magnífiku Reitor no Dekanu FEAH atu fó prioridade ba rezolusaun problema estudante sira no asegura katak prosesu hotu-hotu lao tuir lei no regulamentu universidade.
Jornalista: Caryn Camões
Editor: Ana Maria da Silva
