(Díli), Akait, 07/09/20262026 – Timor-Leste sei sai anfitriaun ba Dili Regional Cooperative Conference and Ministerial Dialogue 2026 (DRCCMD 2026) no ASEAN Cooperative Expo 2026, eventu rejionál ida ne’ebé sei hala’o iha Díli, husi dia1 to’o 4 Outubru 2026.
Eventu ne’e sei organiza husi Governu Repúblika Demokrátika Timor-Leste, liu-husi Sekretaria Estadu Kooperativas (SECoop), ho objetivu atu hametin kooperasaun iha setor kooperativa no loke oportunidade foun ba dezenvolvimentu ekonómiku iha rejiaun Sudeste Aziátiku.
Prezidente Organizadora DRCCMD 2026, Olderico Lopes, hatete katak konferénsia ne’e sei lori tema “Empowering Communities, Connecting Nations”, ka “Hametin Komunidade sira, Liga Nasaun sira.
“Eventu ne’e sei halibur Ministros, funsionáriu governu sira, formuladór polítika, reprezentante no federasaun kooperativa, peritu no akadémiku sira, parseiru dezenvolvimentu, setor privadu no reprezentante sosiedade sivíl husi Timor-Leste no nasaun sira iha rejiaun ASEAN,” hatete Prezidente Organizadora DRCCMD 2026, Olderico Lopes iha konferénsia imprensa Akait 07/09/2026.
Tuir Olderico, DRCCMD 2026 sei sai hanesan plataforma importante ida atu diskute kona-ba futuru setor kooperativa iha Sudeste Aziátiku, liu-husi troka esperiénsia, koñesimentu no pratika di’ak entre nasaun sira.
“DRCCMD 2026 sei sai hanesan forum importante ida atu diskute futuru setór kooperativa iha Sudeste Aziátiku, liuhusi troka esperiénsia, koñesimentu no pratika di’ak, no mos atu buka oportunidade foun ba kooperasaun ekonómika rejionál,” nia esplika.
Durante konferénsia, partisipante sira sei aborda tema sira ne’ebé konsidera importante ba dezenvolvimentu setor kooperativa, inklui integrasaun ekonómika ASEAN, polítika no kuadru nasionál ba kooperativa, asesu ba finansas, ekosistema bankáriu, kooperativa bazeia ba komunidade, transformasaun sosioekonómika, parseria rejionál no kooperasaun transfronteirisa.
Diálogu ne’e sei halibur ministros no xefe delegasaun husi nasaun partisipante sira atu diskute kona-ba koordenasaun polítika, parseria rejionál no kolaborasaun transfronteirisa iha área kooperativa.
Tuir organizadór, diálogu ministeriál ne’e espera bele sai espasu ba lideransa no formuladór polítika sira atu fahe hanoin kona-ba oinsá setor kooperativa bele sai mekanismu ida atu apoia kresimentu ekonómiku no dezenvolvimentu komunidade iha rejiaun.
Expo ne’e sei fó oportunidade ba kooperativa husi Timor-Leste no nasaun sira iha ASEAN atu aprezenta produtu, servisu no inovasaun sira ba públiku no partisipante internasionál.
“Expo ne’e sei fó oportunidade ba kooperativa sira husi nasaun ASEAN no Timor-Leste atu aprezenta produtu, servisu no inovasaun, no mos atu buka asesu ba merkadu, investimentu, parseria negósiu no kolaborasaun transfronteirisa,” nia hatete.
Kooperativa Timor-Leste sira ne’ebé selesionadu husi munisípiu sira sei partisipa diretamente iha expo ne’e. Sira sei lori produtu no servisu lokal atu hatudu diversidade, kreatividade no potensial setor kooperativa nasional ba vizitante no partisipante sira husi rejiaun ASEAN.
Ba Timor-Leste, eventu ne’e la’ós de’it oportunidade atu simu delegasaun no reprezentante kooperativa husi nasaun oioin, maibé mos bele sai espasu ida atu promove produtu lokal, kria ligasaun negósiu foun no haforsa relasaun ekonomia ho nasaun sira iha rejiaun.
Ho realizasaun DRCCMD 2026 no ASEAN Cooperative Expo 2026, Timor-Leste espera bele kontribui ba esforsu rejionál hodi hametin setor kooperativa hanesan parte importante ida husi dezenvolvimentu ekonómiku no sosial bazeia ba komunidade.
Jornalista: Madalena de Lima
Editor: Ana Maria da Silva
