(Díli), Kampus UNITAL, 10/07/2026 – Implementasaun lei kriminalizasaun difamasaun no injúria tenke halo ho kuidadu atu bele hametin Estadu de Direitu, maibé la bele limita liberdade espresaun ne’ebé garante iha Konstituisaun RDTL.
Iha semináriu ne’e orador Luis de Oliveira Sampaio esplika,implementasaun lei kriminalizasaun difamasaun no injúria sai asuntu importante ida ne’ebé presiza hetan diskusaun kle’an husi governu, Parlamentu Nasional, órgaun justisa, média no sosiedade sivil. Tuir nia, prosesu implementasaun lei tenke konsidera aspetu jurídiku, polítiku no sosial atu evita interpretasaun ne’ebé bele prejudika direitus sidadaun sira.
Nia hateten,lei ne’e iha oportunidade atu fó protesaun ba dignidade no reputasaun ema ida-idak, maibé iha tempu hanesan mos iha risku karik implementa la ho lolos, tanba bele afeta liberdade imprensa no liberdade espresaun.
“Implementasaun lei kriminalizasaun difamasaun no injúria tenke halo ho balansu. Estadu presiza proteje direitus no dignidade sidadaun sira, maibé mos tenke garante liberdade espresaun tuir prinsipiu demokrasia no Estadu de Direitu,” dehan Luis de Oliveira Salaun Unital Becora 10/07/2026.
Durante aprezentasaun, Luis mos analiza katak aplikasaun lei refere tenke bazeia ba evidénsia jurídika ne’ebé forte, prosesu justu no transparente, no la bele uza atu limita krítica konstrutiva hasoru polítika públika ka atividade governasaun. Nia konsidera katak liberdade espresaun mak parte importante husi demokrasia ne’ebé tenke proteje nafatin.
“Prinsipiu direitus umanus no justisa ne’ebé lalos no justu tenke sai baze prinsipal iha implementasaun lei ida ne’e, atu garante katak sidadaun hotu-hotu hetan tratamentu hanesan iha lei nia oin,” nia aumenta.
Nia husu ba entidade relevante sira, atu kontinua halo diálogu no konsultasaun públika kona-ba implementasaun lei kriminalizasaun difamasaun no injúria. Nia fiar katak, liuhusi diskusaun inkluzivu no partisipasaun husi parte hotu, Timor-Leste bele dezenvolve sistema legal ida ne’ebé forte, respeita direitus umanus no hametin demokrasia.
Jornalista / Estajiada : Josefina Maria freitas Desá
Editor :Ana Maria
